Bu gün

...bu gün

mənə qonaq gəl,

şəhərə çıxaq,

qoluna girim,

sığınım sənə -

yanıb-tökülsün cavan oğlanlar...


gəl,

sənə

illərdi görmədiyin,

bilmədiyin

qızından danışım...


tanıdığı yaxşı-pis adamlardan,

darıxdığı axşamlardan

onu incidənlərdən,

sevənlərdən

danışım...


tənhalığının tən ortasından

sənin bir zənginlə

xilas olub

sonra

uşaq kimi ağladığını da deyimmi?


gözləyirəm

sən də

onu nə qədər

çox istədiyindən danışasan

ömründə ilk dəfə...


bilirsən ondan nə soruş?

soruş ki,

ən böyük arzun nədi...?


bir də

“bəs ən böyük qorxun?” soruş

cavab almamış...


o da ürəyində:

“... itirmək...

səni və anamı...” - desin...


...istəyirəm,

əlimdən tutub aparasan

karuselin qarşısındakı

dondurmasatanın yanına

“hansını ürəyin istəyir, götür” deyəsən...


...sonra

anama zəng edək,

hansısa dükandan

tapıb gətirək

qoşulsun bizə


sən sağımda – sağım daha güclü

anam solumda – solum daha həssas

üzü dənizə dayanaq

bir az susaq

sonra ikiniz də mənə

o Günəşli aprel səhərindən danışın –

dünyaya bir qız gəlirdi...


...gəl, ata,

gəl, dərdləşək,

bu gün sözlə anlaşaq...