səfəri
05-21-2010, 10:41 PM
توپراق قوخوسو
دکتور دیک یئریندن قالخاراق یومروغونو قالدیریب میزین اوستونه چیرپدی. کیشی یئرینی راحاتلایاراق دئدی: - جناب لاپ ائله وور اللرین پارچالانسین. دئدييیم كيمي يئريوي بيلمهسن بيلديرهرم. يازديقلاريني اينكار ائله. دؤولتينن اويون اويناماق اولماز.
دوکتورون اوزونون قیزارماسی نه قدهر چوخ عصبیلشدییینی، سؤزون قاباغیندا اودوزدوغونو گؤستریردی.
کیشی داوام ائتدی: - منیم حاققیمدا یازدیقلارین محض یالاندیر. یا بونلارا ثبوت گتیریب سهو ائتدیینی دئیهجکسن یادا حاققینی اووجونا قویارام.
دوکتور کیشییه ساری جوموب ایکی اللی اونون یاخاسیندان یاپیشیب سیلکهلهيرك: - زيبيل دئييرسن بس نه واختا جان پ ... لاريزي يودودا بيلهجكسيز؟ - دئدي. یئریمدن قالخیب کیشینی دوکتورون اللریندن چیخاردیب اوفیسدن ائشییه یؤنلندیرديم. قاپینی باغلاییب دوکتورون یانینا قاییتدیم.
- آقای دوکتور باشیوا یامان ایش آچیبسان. - دئیه اونو صندلینده اوتورتدوم.
دوکتورون گؤزلری قیپ قیرمیزی قيزارميشدي. دوشونوردوم ایهر اورادا اولماسایدیم بلکه ده هونکور– هونکور آغلایاجاقمیش. چانتامی گؤتوروب دئدیم: - من داها گئدیم. یئنه ده ایشیز اولسا زنگ ائدرسیز.
اؤزومو بیر آنلیغا دوکتورون یئرینه قویوب اونون نه حالدا اولدوغونو باشا دوشمهیه چالیشیردیم. آما اوندان چوخ اؤزومو دوشونوردوم. بو کیشی دوکتورون اوفیسینی باغلاتدیرارسا ایشسیز قالاجاغام. دوکتورو قورخودوب تکذیبییه یازماغینا راضیلاشدیرسايديلار هر شئي يولوندا اولاجاقدي.
قیشین اورتالاری ایدی. دیزه کیمی قار یاغمیشدی. اوفیسدن چیخیب یاریم ساعات قار آلتیندا قالاندان سونرا اوتوبوس دوشدو. اوتوبوسا مینیب ائوه ساری یوللانديم. کیشینین اوفیسه گلیب هده- قورخو گلديییندن بری قریبه بیر حیس اورهییمی بوروموشدو. تئز – تئز، دانیشدیقلاری سؤزلری آغلیما گتیریب آغیر سنگین ائدیردیم. بو دوکتور هر نه اولسا آنامین سؤزونو یئره سالماییب منی ایشسیزلیکدن قورتاردي. آز پولا ایشلتسه ده ایشسیزلیکدن مین قات یاخشیدیر. آه ... اوفیسی باغلاسالار نئجه اولاجاق؟!
ترلهمیش پنجرهلری سیلیب باییرا باخدیم. تبريزين كوچهلرينه آغ آبباق قار نه قدهر ده ياراشيردي. اؤنوموزدهكي دایاناجاق بیزیم محلهنین دایاناجاغی ایدی. آیاق اوسته دوروب اوتوبوسون قاپیسینا ساری گلدیم. اوتوبوس دایاناجاقدا دایانان کیمی آشاغی دوشوب، قزئت دککهسینین قاباغیندا دايانيب تاختا اوستونده دوزولموش قزئتلرین بؤیوک یازیلاریني گؤزدن کئچیرندن سونرا یولا دوشدوم.
قار یئنه ده اؤز یاغماغیندا ایدی. ساکیت و اؤزونه مخصوص بیر ریتمله گؤیدن یئره دوشوردو. هر داناسی یئره دوشونجه دفعهلرله فیرلانیردی. ائله ساکیت گؤرونوردو کی سانکی بیر آزدان اَرییب یئره جوممایاجاقدی. محلهنین باشیندان بیزیم قاپی یاخشیجا گؤرونر. دؤنوب محللهیه گیرینجه آنامی گؤرهجکدیم. آنام هر زامانکی کیمی نارین گوللو چادیراسیني باشینا آلیب قاپی آغزیندا دایاناراق منی گؤزلهییردی. اورهییمی نیسگیل حیسي بورودو. کؤکسومون اوستو آغیرلادی. ایشسیزلهسه ایدیم، ....! آنامین سسی دالدیغیم فیکیرلرچنبريندن چکیب چیخارتدی. ائوین قاپیسینا چاتمیشدیم. چانتامی الیمدن آلیب بیرلیکده ائوه گیردیک.
گئجه یارییا گلسه ایدی ده من هله یوخلامامیشدیم. پنجرهنین اؤنوندن قونشونون دیواری گؤرونر. یاتاغیمدا اوزانيب، آرخا کوچهدن گلیب گئدن ماشینلارین ایشیقلارینین شووقونو اوزبهاوز قونشونون دیواريندان ایزلهیهرک دوکتور ایله کیشینین آراسیندا کئچن داوا- دالاشین داغینیق صحنهلرینی بئینیمدن کئچیریردیم. بلکه ده کیشینین دئدیکلری سادهجه دوکتورا گؤز قورخوسو وئرمکدن باشقا هئچ بیر شئی دئییلدی. بلکه ده صاباح، ائرتهسی گون و نئچه ایللر و دوکتورون اؤز دئییشینه گؤره، دوکتور ساغ ايکن اونونلا ایشلهیه بیلهجکدیم .
هاچانسا یوخویا گئتدییمی خاطیرلامیرام. اوتاق قاپیسینین آچیلیب باغلانما سسیندن اویانیب تازا چؤرهیین قوخوسونو دویدوم. آنام هر گون سحر تئزدن تازا چؤرهک آلماغا گئدرمیش. بو قوخو نییارانلیق حیسلریمه بَلَشیب هر گونکو دادینی ایتیردی. آنام دهییشدییمی، درد چکدییمی آنلادی. سفرهنین باشیندا اوتوروب هردن بیر گؤز آلتی اللریمی، اوزومو سوزوردو. هردن ده بیر باشینی بولاییردی. قورخدوغوم کیمی اولسا، البته كي آنام بیلهجکدی. تئلفون سسلندی. یئریمدن سیچراییب دستهیی گؤتوردوم. دوکتورون سسی تئلفون آرخاسیندان قولاغیما دهیدی:- اوغلوم بو گون گلمه، بیر آز ایشلریم واردی. آیلیغیوی میزیوین کشووندا بیر پاکاتا قویموشام. بیریسی گون گلنده، من اولماسامدا اوفیسی آچیب گؤتوررسن.
دوکتورون سسی تاماماً دهییشمیشدی. اونون یوموشاق و بیر آز یاواش سسینین تونو بام باشقا اولموشدو. تیترهک سس ایله سؤزون دئییب، دانیشماغيما ماجال وئرمهدن تئلفونو کسدی. یئریمدهجه دستک الیمده قورویوب قالمیشدیم. او منه پولونو گل گؤتور و بیر داها ایش اوچون بورا گلمه دئدیمي، یوخسا....
آنام هر زامانكي كيمي بالاجا یئمک قابیمی چانتاما قویوب قاپی آغزینا کیمی گتیررک یولا سالدی. دوکتورون تئلفون آرخاسیندا نه دئدیینی و ایش یئرینده نلر اولدوغونو آناما دئیه بیلمزدیم. نئچه آی ائوین پول گتیرهنی اولوب، آناما صاحاب چیخمیشدیم. یاشادیغیم بو غورورون داغیلاجاغینی آناما دئمهیه گوجوم یوخ ایدی.
کئچن گون باشا- باش قار یاغسایدی بئله، هاوانین یاغماسی داها کسیلمیشدی و سویوقلوغوندان دا آزالمیشدی. شهرین چئورهسینده اوجالان داغلار آغ آبباق و آیدین گؤرونوردو. اوتوبوسا مینیب شهرین اورتالارینا گئدیب دایاناجاقلارین بیرینده دوشدوم. اوتوبوسدان دوشونجه سویوق بدنیمی گیزیلدتدی. ساغ قولومو گؤزومون قاباغینا گتیریب ساعاتا باخدیم. هر گون بو زامان اوفیسین قاپیسیني آچارام. اؤنجه اوست پالتارلاریمی سویونوب سونرا مطبغه گئدیب ساماواری یاندیرارام. مندن یاریم ساعات سونرا دوکتور گلر. دوکتور زنگین عایلهدن چیخمیش اولسا دا داورانیش و دانیشیق طرزیندن زنگینلردن داها چوخ فرقلنیردی. ائله اونون یانیندا راحات ایشلهمهییمین بیرسببی ده بو ایدی. یوخسول آدام گؤرنده باشینی بولاییب چوخلو– چوخلو چتین معنالی لغتلرله سؤزلر دئیردی. بعضا ده كيميلره سؤيوش وئرردي. من بونلارين هئچ بيريندن باش چيخارمازديم.
آخشاما کیمی شهرده گزدیم. آرادا بیر کافهلره گیریب چای ایچمک آدینا قیزیشیردیم. هر هانسی یانا گئدیب نه ایش گؤرنده یئنه ده دوکتور و کیشی گؤزومون قاباغیندا جانلانیب دارتیشماغا باشلاییردیلار. دئییهسن فیکیرلشمکدن بئینیم شیشمیشدی. باشيم آز قاليردي پارتلاسين.
پارکین چیخیشیندان ساغا دوغرو گئدنده کوچهنین اوبیری الینده، اوفیس گؤرونر. پنجرهدن ایشیقلاری گؤردوکده تعجبلندیم. اورا گئدیب ایچریدن باش چیخارماق ایستهییردیم. دوشوندوم کی دوکتور اوفیسدهدیر.کوچهنی کئچیب اوفیسین بیناسینا یاخینلاشدیم. نئچه دؤنه قاپینی دؤیدوم. کیمسه آچمادی. آچاریمی چیخاریب قاپییا سالدیم. دئیهسن قاپینین ایشگیلینی ایچریدن سالمیشدیلار. آچاری چیخاردیب قاییتدیم. اؤز- اؤزومه دئدیم: - بلکه دوکتور ایچریده یاتیبدیر. بونا گؤره قاپینی دا آچمادی.
قولومداکی ساعاتا باخدیم. هر گون بو ساعاتدا ایشلریمی قورتاریب اوفیسدن چیخاردیم. آرتیق ائوه گئتمک واختی گلمیشدی. بونا گؤره ده هر زامانکی کیمی اتوبوسا مینیب ائوه گئتدیم.
آنام سانکی منی اوخویورموش. اورهییمدن کئچنلری سوروشمادان دویورموش. چانتامداکی یئمک قابیمی ال دهیمهمیش گؤرونجه سوکوتومو پوزوب منی حیسلریمدن چیخاراراق اؤزومه گتیردی. –تورپاغا سانی یاشایاسان، رحمتلیک آتان کیمی هر شئیی اؤز ایچیوه ساليرسان. –دئدی. آنام توختاقلیق وئریرمیش کیمی دانیشدی: آللاه کریمدیر. هرهنین روزوسون او کیشی گؤروب.
بوغازیمی قهرکسدی. دیندیرسه ایدی آغزیمی آچمامیشدان آغلایاجاقدیم. قاپی دؤیولدو، دیندیرمهدی. سرییه ننه بیزه گلنده قوناق اوتاغیندا ساعاتلارجا آنام ایله دانیشاردیلار. گؤزومو آچاندان بری سرییه ننه قونشوموز ایدی. قوجا و مهریبان قادین ایدی. اری اؤلموشدو و اوشاقلارینین دا هامیسی ائولنیب گئتمیشدیلر. هردن ائله صحبته گیریشردیلر کی ائوه بمبادا دوشسه ایدی بیلمزدیلر. بوغازیمین قهری پارتلادی. دویونجا آغلادیم. آنامین جهره اَییریب نئچه تومن پول قازاندیغی گونلری خاطیرلاییب آغلادیم. آتامین هاچان اؤلدویو یادیما گلمزدی. البته آتامین اوزونو آنجاق تاخچامیزدا اولان شکیلده گؤرموشم. آنام دئیر:- ایییرمی ایله یاخین اوولاد صاحابی اولمادیق. سن دوغولونجا دا آتان اؤزونو ان موتلو اینسان سانیردی. دووار اوچوب آلتیندا قالماسایدی سنین بو گونونو ده گؤرردی.
بلکه ده آتام ساغ اولسایدی بو گونومو بئله گؤرمزدی. اوشاقلیغیمدان قالان، آنجاق آنامین چاتلاق اللریندن و جهره جیریلتیلاریندان قیریق خاطیره لردیر کی هر آن عزراییل کیمی حیسلریمه گیرهرک بوغازیمی سیخیردی. قونشولوغوموزداکی یاشیدلاریمی دوشونوردوم. ماتور ایله بوردان اورا، اوردان بورا ایلغیملایاراق گنجلیک آنلارینی یاشاییردیلار و من آتامین یئرینه اونون قوجالیغینی یاشاییردیم . آنامین گون به گون اَرییب کیچیلدیینی گؤرهرک بیر گون داها یوخ اولوب قورتارماق قورخوسوندان گئجهلر نئچه یول یوخودان داشلاناردیم. بو اوزدن کیمسهدن ائشیتمهسه ایدیم ده اؤزومو یاشلانمیش بیری سانیردیم. گوزگوده گؤز ببکلریمین ان درینلیکلرینه جوموب ائله بیر کدر و دورغونلوق حیس ائدیردیم کی اونلاردا بعضا اؤزوم ده اؤزومه کؤورهلیب نئجه آجی بیر طالعه صاحیب اولدوغوما گؤره تاسسوف ائديرديم. او آخشام بونلارین هامیسینی یادیما سالیب آغلادیم.
سحر چاغی هر زامانکی گونلردن داها تئز یوخودان دوردوم. داها دوغروسو گئجهنی یاخشیجا یاتا بیلمهمیشدیم و سحره کیمی گاه اویانیب گاه یاتیردیم. " او گون تئلفوندا دوکتور نه دئمک ایستهییردی؟ ندن منی دانیشماغا قویمادی.؟" و بونلارا بنزر نئچه – نئچه سورغولار بئینیمه جوموب منی اؤزونه مشغول ائدیردی. ساعات 8 ایدی. اوتوبوس، اوفیس اولان کوچهنین دایاناجاغیندا دایاندی. اوتوبوسدان دوشوب دایانمادان بیر باشا اوفیسه دوغرو یوللاندیم. پیلله یوللاری هر گونکو کیمی سوپورولموشدو و هر شئی سانکی اؤز قایداسیندایدی. پیلله لردن یوخاری چیخدیم. بیرینجی مرتبه، ایکینجی مرتبه و سونرا ایسه اوچونجو مرتبه. بیزیم اوفیس اوچونجو مرتبهده ایدی. قاپینین اؤنونه چاتینجا الیمی جئبیمه سالیب آچاری چیخارتديم. آچاری قاپییا یاخینلاداراق یئریمدهجه قورویوب قالدیم. قاپی پولومپلانمیشدی.
کوچهنی آددیملایاراق آياقلاريمي یئرده یوخ، هاوادا بیلیردیم. دایانمادان شهری آددیملاریم آلتینا سالمیشدیم. نه سویوغو بیلیردیم نه ده هارادا اولدوغومو. بیر آندا اؤزومو ائوین قاپیسیندا گؤردوم. آنام چرهکهسینی الینه آلیب اونون دانالارینی بارماقلاری ایله او یان بو یانا وئرهرک دیل دوداغی آراسیندا نلرسه دئییردی. اوتاغا گیریب قاپی آغزیندا یئره اوتوردوم. آنام باشینی قالدیریب منه باخدی. – یازیق یاخشی آدام ایدی.- دئدی.
دئدیم: - کیم؟
دئدی: - دوکتور جاوید دا.
سوروشدوم:- سن اوفیسین جریانین هاردان بیلدین آنا؟
آیاغا دوروب تاخچادان بیر پارچا کاغیذی گؤتوروب منه دوغرو گتيردي.
- باققال حسین بو گون بونو گتیريب. یازیق اؤزون آسمیشدی.
کاغیذی آلیب باخدیم. یاس تؤرهنینین اعلامیهسی ایدی. آنامدان بیر سؤز سوروشمادان قورویوب کاغیذا باخدیم .
دوکتورو تورپاغا باسديرديق. هلهده گیجلیکدن چیخمامیشدیم. ایشیمين فیکیری و آیلیغیمین الیمه گلیب – گلمهیهجهیی، منی بیر آن دا اولسون بئله راحات بوراخمیردی.
آرتیق ياس بیتمیشدی. ائوده یورقونلوغومو چیخاریردیم. قاپی دؤیولمهیه باشلادی. آنام قاپینی آچدی. بیر کیشی سسی دویولدو: – آقای صابیر سلطانی گیلین ائوی دیر؟
اوتاقدان چیخیب آنام بیر سؤز دئمهمیشدن اوجا سسله اونون جوابینی وئردیم:- بلی بورادیر . بیر دهیقه!
قاپی آرخاسیندا پلیس مامورو ایدی. گؤرونجه ال- آیاغیم تیترهمهیه باشلادی. – بوُیورون سرکار.- دئدیم. دئدی: - دکتورون اؤلومو بیزه گؤره شوبههلی اؤلومدور. بونا گؤره ده اؤلومون دلیلینی آیدینلاشدیرماق ایستهییریک. او نئجه آدام ایدی؟ دشمنی زادی یوخ ایدی کی؟
دئدیم: - دوکتور چوخ یاخشی آدام ایدی. اونون دوشمنی سانیرام کی هئچ یوخ ایدی. آما سون گون بیر کیشی اوفیسه گلیب دوکتور ایله دانیشیب هده – قورخو گلندن سونرا گئتدی.
پليس دئديكلريمي دينلهييب اليندهكي كاغيذلارا نلرسه يازيردي. ايكي گون سونرا ساعات 9- دا محللهنین کلانتریسینه گئديب ایفادهنی تکمیل ائتمهييمي دئييب گئتدي.
کلانترییه گئديب ایفاده وئرمکدن او قدهر قورخماسایدیم دا آنامین سیزیلدایاراق قورخمالی یوْروملاری اورهییمی اوزوردو. سانکی بیر شئیلرين اولاجاغي آنامین اورهیینه داممیشدی. اوتوروب – دوروب دئییردی:- آی بالا آللاه ائلهمهميشدن دوکتورون اؤلومون سنین باشیوا سالارلار.
قورخدوغومو گیزلهدهرک گولومسهییب دئییردیم: - یوخ آنا . بئله اؤلوملرده، اؤلونون اطرافینداکیلاردان سورغو سوال ائلهیرلر.
آرتیق بیر گوندن سونرا کلانترییه گئتمهلییدیم. سون گون اوفیسده نلر اولدوغونو و او کیشی ایله دوکتورون آراسیندا دئییلن سؤزلری اؤز بئينيمده سالیب چیخیردیم. تئلفونون زنگی سسلندی. دستهیی گؤتوروب دانیشماغا باشلادیم. تئلفون آرخاسیندان بیر کیشی سسی گلیردی:- آقای صابیر سلطانی؟!
- بلی، بویورون، اؤزومم.
- سنی گؤرمهلییم. دوکتور حاقدا مهم سؤزوم وار سنه. هاردا سنی گؤره بیلرم؟
همین گون ساعات 3-ده اوفیسین اوز به اوزوندهکی پارکدا گؤروش قراری قویدوق. سوروشدوم:- سیزی نئجه تانییاجاغام؟
دئدی:- من سنی گؤرونجه تانییارام. ائله سنده منی تانییاجاقسان.
کیشینین سون سؤزو منی دوشوندوردو. تانیش اولماسا نئجه اونو تانییا بیلرم. بونا گؤره مشتریلریمیزدن بیری اولدوغونو ساندیم .
اوفیسین اوزه به اوزوندهکی پارک چوخ کیچیک ایدی. بو باشیندان او بیری باشینا گئتمک اوچون سادهجه ايكي دهیقه یول گئتمهلییدیم. نئچه دؤنه پارکین اولیندن آخیرینا کیمی دولاندیم. تانیدیغیم بیر کیشی گؤرمهدیم. ساعاتا باخدیم. قراردان آرتیق اون دهیقه ده کئچمیشدی. بیری آرخادان منی سسلهدی. دؤندوم. گؤرونجه تانیدیم. اوفیسده دوکتور ایله دالاشان کیشی ایدی. سالام وئرهرک الینی اوزاتدی. الیندن توتوب سالامینی آلدیم. اورداجا سؤزونو دئمهیه باشلادی: -آقای سلطانی، دوکتوردان باشلادیغیم بیر ایشی سیزده قورتارماق ایستهییرم.
تئز سوروشدوم:- نه ایشی؟
دئدی:- ائشیتمیشم پلیس قاپیزا گلمیشدی. منیم حاققیمدا اونلارا بیر سؤز دئسن باشینی بلایا سوخا بیلرسن.
ال- آیاغیم تیترهمهیه باشلادی. دیلیم توتار- توتماز دئدیم: - نه... یه ... کی؟!
سسینی محکملندیرهرک :- اوراسی دا سنه مربوط دئییل. دیری قالیب آناوی آغلار قویماق ایستهمهسن، کلانترییه گئدیب اونلارا منیم حاققیمدا دئدیکلرینی تکذیب ائتمهلیسن. بئله ائتسن، بؤیوک مبلغده پول آلیب راحات یاشایاجاقسان یوخسا دوکتورون باشینا گلن سنین ده باشیوا گله بیلر. کیشی قطعیتله دانیشيردی. دوکتورو، قارشیمدا منه قورخو گلن بو کیشینين اؤلدوردویونه داها دا شوبههلنديم.
دانیشماغا اینجاریم یوخ ایدی. دیلیم قورخودان باتمان داشینا دؤنموشدو. اونا آغلاییب یالوار یاخارماغا بئله ایمکان تاپمادیم. سؤزلرینی دئین کیمی آیریلیب گئتدی. دانیشیغیمیز بئش دهیقه بئله سورمهدی. بو آز واختدا، دونیا بویدا آغیرلیغی یوک کیمی بوینوما ییخدی. کیشی گئتدی و منه بؤیوک بیر قورخوکؤلگهسی بوراخدی. آرتیق نه ائدهجهییمی بیلمهییردیم . دوغرو دئسم اؤله بیلرم، یالان دئسم ده اورهییم ساکیت قالماز بلکه ده زیندانا دوشه بیلرم، بلکه ده قانون یالان معلوماتیما گؤره باشقا جور جزالاندیرسین. ایکی قارانلیق یولون اورتاسیندا ایشیق یولو تاپماق اوچون چابالاییردیم. بیری تام یوخ اولماغیما چاتیردی بیریسینین ده سونو هله کی بللی دئییلدی. اوچونجو یول ایسه عاغلیما چاتمیردی. آناملا مصلحتلشسه ایدیم یازیغین اورهیینی اوزه بیلردیم. او گون کیشینین قاباغیما قویدوغو یوللاری نئچه دؤنه اینجهلهییب دوشوندوم. آلا بولا فیکیرلر سارماشیق کیمی بئینیمی بوروموشدو. سونوندا کیشییه بویون اَیمهییمه قرار وئردیم.
آنام قاپی آغزیندا دوروب قورانی قاپینین باشیندا ساخلادی. اوچ دؤنه قاپیدان گیریب چیخدیم . – سنی آللاها تاپیشیردیم اوغول، سن حاققینان اول، حاق سنینلهدیر. - دئینده، توتدوغوم فیکیر داش کیمی بئینیمه چیرپیلدی. کیشینین دئدییینه بویون اَیهجکدیم آنامین سؤزو قاباغیمی آلدی. داها دوشونمهدیم. نه اولاجاق اولسون ! - دئییب کوچهیه چیخدیم. سویوقدان یئر بوز باغلامیشدی. محللهنین دؤنومو داها سوروشکن ایدی. احتیاطلا محللهدن چیخاندا بیریسی یول قیراغیندان منی سسلهدی. اوفیسده اولان کیشی ایدی. قارا رنگلی بیر آرابادا اوتورموشدو. مینمهییمی ایستهدی. مینمهیینجه الینی یاواشجا منه گؤستردی. الیندهکی توپانچانی گؤروب ماشیندا اوتوردوم. کیشی ماشینی سرعتله محللهدن چیخاردیب یاخینلیقدا اولان پارکین قیراغیندا دایاندیردی. اؤزومو محکم توتموشدوم. قورخدوغومو اونا هئچ بللی ائتمهمهلییدیم. کیشی غرورلو و تكبورلو سس ايله دانيشماغا باشلادي. البته ائله اونو تانيياندان سس تونو بئله ايدي. – دئ گؤروم سؤزلريمين اوستونده فيكيرلشدين؟
- هه، فيكيرلشديم.
- حتما دئديييمه باخاجاقسان.
- يوخ! گئديب هر شئيي پليسه دئيهجهيم.
- سن دئ، گؤر نه اويون آچارام باشيوا.
ماشینین قاپيسیني آچيب باييرا چيخديم. پنجرهسيندن كيشينين اوزونه باخاراق:- يوخاري باشي، قورو جانيمي آلاجاقسان دا. من يالان دانيشا بيلمهرم.- دئییب یولا دوشدوم.
کلانتریده دوکتورون پروندهسي ایله یوغون چال پئر بیر پلیس ماراقلانیردي. بونو اوتاقلارین بیرینده اوتوران پلیسين ديليندن ائشيتديم. اوتاغین او بیری باشیندا میز آرخاسیندا، تئلفون ایله دانیشان یوغون چال پئر پلیسه باخاراق اونون یانینا گئتمهييمی دئدی. احتیاطلی آددیملارلا پليسه یاخینلاشیب، میزینين قیراغینا سؤیکهنهرک دوردوم. پلیس دستهیی قویدو.
- جناب سرکار، دوکتور جاویدین پروندهسینه گؤره منی چاغیرمیشدیز. –دئدیم.
پلیس اوزومه باخاراق بیغینین بیر اوجونو دیشلرینین آراسینا سالیب چئینهیهرک دئدی:- هه ! سن اونون نهییسن؟
- جناب سرکار، دفترینده ایشلهییردیم.
- پرونده باغلانیب . سنده چیخ گئت. - دئدی.
اودقوناراق قورخودان قورویان بوغازیمی بیر آز یوموشاتدیم. – ائئئئئئئ آخی دئييرديلر، اؤلدوروبلر؟!
پلیس اوزونون ایفادهسینی آنیجه دهییشدیریب عصبی بیر حالدا اوجادان باغیراراق دئدی:- اولان اؤزو اؤزونو اولدوروب. چیخ گئت، بیردونیا ایشیمیز واردی.
پلیسین چیغیرماسی ایله یئریمدن داشلاندیم. – بلی - بلی. اللریز آغریماسین. - دئییب اوتاقدان چیخدیم.
دئمک دوکتور اؤلدورولمهمیشدی. بونو پلیسدن دویدوم. بیر گئجهنین ایچینده، نلر اولموشدو؟ بیر پلیس قاپییا گلیب دانیشماغیمی ایستهییر. دوکتورلا دالاشان کیشی گلیب قاتیل اولدوغونو دئییر و مندن ده اونا بویون اَیمهییمی ایستهییر و سونرا پليس پروندهني باغلاياراق هر شئيي بيتميش سانير.
یولون اورتاسیندا دایاندیم. آنام دئمیشدی؛ من حاق ایله اولسام حاق دا منیمله اولاجاقدیر. شوبههسیز كي بو بئله اولمالییدی. آنام بوشو-بوشونا دانيشمازدي. هر شئيدن خبري اولاردي. قئيبدن بيلرميش کیمی دانیشاردی. اؤز دئييشينه گؤره، اورهيي خبر وئررميش. بیر داها کلانترییه دؤندوم. یوغون و چال پئر پلیسین میزینین باشینا گئتدیم. هر نهیی اونا دئمهیی دوشونوردوم. اولدن آخیرا کیمی دئدیم. سرعتله دئییب او هیرسلنمهدن سؤزومو قورتاردیم. پلیس یئریندن قالخیب اوزومه سیللی آتالی چوخ آنیجه اولدو. نه زامان آیاغا دوروب و سیللی آتدیغینی بئله دویمادیم. ایچیمی چکیب سؤزومو دایاندیردیم. پلیس، میزین اوستوندهکی تلفونون دستهیینی قالدیردی. بیر-ایکی رقملی نمرهنی ییغیب گؤزلهدی. بیر آزدان دانیشماغا باشلادی: - تیمسار سلام! سؤزون دوزو، دوکتور جاویدین همکاری بوردادیر. دئییر، دوکتورو اؤلدوروبلر.
پلیس تئلفونون او بیری طرفینده اولانین سؤزونه قولاق وئره – وئره اوزومه باخدی. سونرا ساغاوللاشیب دستهیی تئلفونون اوستونه قویوب اوجادان کاریدوردا دوران عسگری چاغیردی. عسگر سرعتله اوتاغا گیریب پلیسه سایغی گؤسترمک علامتی اولاراق ساغ آیاغینی یئره چیرپیب، دوز دایاندی.
- بو اوغلانی ایچری سال.
عسگر يئنيدن ساغ آياغيني يئره چیرپاراق الینی قولوما سالیب، یئریمدن قالدیردی.
- جناب سرکار آخی منیم گوناهیم یوخدور کی. - هيجانلا دئدیم.
سؤزومه باش قوشماییب الیندهکی پروندهيه باخیردي. عسگر منی اوتاقدان چیخاریب، کاریدورون سونونداکی قاپینی آچیب ایچری ایتهلهیهرک یئنیدن قاپینی باغلادی.
آخشام ساعاتلاريندا قارانليق و شئحدن نموولانميش اوتاغين قاپيسي آچيلدي. كاريدورون ايشيغي گؤزومو قاماشديردي. گؤزلريمي آچيب ياخشيجا باخا بيلمهديم. بيريسي دستمال ايله گؤزلريمي باغلادي. سونرا ايسه اللريمي آرخادان باغلاييب ايتهلهيهرك قاباغا گئتمهييمي ايستهدي. تئز-تئز هارا آپاراجاقلاريني و نه اوچون بئله داورانمالارينين ندنين سوروشوردوم. هر دفه ده يومروق و شيلله ايله جاواب آليرديم. ماشينا مينديريلديم. ماشين بوروق – بوروق يوللاري كئچيب نهايت، بير يئرده داياندي. هارا گئتدييمي بيلميرديم. شاشقينليقلا آنجاق گؤزلهييب ايشين سونونو گؤرمهلييديم. بو آرادا اؤزومدن چوخ آنامي دوشونوردوم. يقين قاپي آغزيندا دايانيب كوچهنين باشيندان محللهيه گيرمهييمي گؤزلهييردي.
صندلين اوستونده اوتورتدوروب گؤزلريمي آچديلار. داراجيق، آزجا دا قارانليق بير اوتاق ايدي. آنجاق تاوانين اورتاسيندان آشاغي طرفه ساللانان لامپانين ايشيغي ايله ايشيقلانديريلميشدير. بير آزدان قاپي آچيليب تميز گئييملي، كيراواتلي كيشي ايچري گيردي. اورتا بويلو، بير آزدا كؤك ايدي.
آدیم، سوي آدیم، آتامین آدي، دوغوم ايلي، دوغوم يئري و منه عايد اولان بوتون معلوماتيمي سوروشدو. آغزيمدان چيخان هر شئيي گؤزلريمي آچان كيشي يازيردي. سونرا دوكتور جاويد حاقدا سوروشدو:- دوكتور جاويدي سن اؤلدوروبسن؟
- يوخ من نهيه اؤلدوروم كي؟! دوكتور اؤلمهميشدن بير گون قاباق اوفيسينده بير كيشي طرفيندن هدهلنميشدي. اولا بيلسين كي او اؤلدوروب.
دوكتورلا كيشي حاقدا بيلديكلريمين هاميسيني دئديم.
تميز گئييملي كيشي امینلیکله دئدی: - سن همين گون اوفيسين قاپيسين آچميشدين. بارماق ايزلرين قاپينين اوستوندهايدي. آرتيق سنين قاتيل اولدوغونو بيليريك. اعتراف ائتسن هر شئي يولونا گيرر. يوخسا ....
بوتون بدنيمي آغري بوروموشدو. آياقلاريمي باغلاييب آلتينا شاللاق وورودولار. آنجاق آنامين سؤزونه گؤره دايانميشديم. دؤزوموم قورتاريب بوينوما آلماق ايستهينده آنام گؤزومون قاباغينا گليردي. من حاق ايله اولسام حاق دا منيمله اولاجاقدير. نه قدهر ده ايشكنجه وئرسهلر بوينوما آلماياجاقديم.
نئچه گون ايچريده اولدوغومو بيلميرديم. يارالاريمین آغريسيندان اؤزومه قيوريليرديم. اوتاغين قاپيسي آچيلدي. ايكي عسگر و تميز گئييملي كيشي ايچري گيرديلر. عسگرلردن مني گؤتوروب حبسخانايا كؤچورمهلريني ايستهدي. عسگرلرين بيري ساغ قولوما بيريسي ده سول قولوما گيريب يئردن قالديراراق كاريدورا چيخارديلار. آياقلاريمي يئره باسديقدا شيشميش قابارلاري دئشيليردی.
ساغ-سولومداكي ايكي عسگر و حاققيمدا قورولان بؤيوك بير دوسييا ايله بيرليكده حبسخانايا گؤندهريلديم. اورا آياق باسان باشقا محكوملاردان فرقلي اولاراق منيم گوناهيم گوناهسيزليغيم ايدي. مني اورادا باشقا بير حيات گؤزلهدييینه اينانيرديم. آما همین باشقا حياتين نئجه اولدوغونو بيلميرديم. سلوللارين بيرينين قاپيسي آچيلدي. عسگر مني ايچرييه طرف ايتهلهدي. سلولداكي ايكي كيشي بيزي گؤروب آياغا دوردولار. بيري گنج، بيريسي ده اورتا ياشلي ايدي. سلولون قاپيسي باغلاندي. ايكي محبوس مني توتوب يئرده اوتورتدولار. گؤزلریم قارالدی و داها نه اولدوغونو بيلمهديم.
گؤزلريمي آچيب اطرافيما باخدیقدا همين ايكي محبوسوگؤردوم. اوزومه باخيرديلار. اورتا ياشلي محبوس ديزلري اوستونده منه ساري سورونوب: - خوش گلميسن اوغول! – دئدي.
من خوش گلميشديم. يئني دونياما، يئني حياتيما، يئني ائويمه خوش گلميشديم. هئچ كيم بيلمهدن گلميشديم. گلديييم دونيامدان، آنامدان خبرسيز گلميشديم. نهيه گلدييمي نه اوچون گلدييمي بيلميرديم. آنجاق بير داوا صحنهسينين شاهيدي اولدوغوم اوچون بورالارا گليب چاتديغيمي بيليرديم. ياتديغيم يئردن قالخيب اوتوردوم. آديمي سوروشدولار. – صابير سلطاني. گوناهيم: - بير داوا صحنهسينين شاهيدي اولموشام.
باشيمي ديوارا داياديم. قارشيمداكي ديواردا جيزيلميش يازيلاري اوخودوم. "سعيد 1330" يازينين قالانيني ياخشيجا اوخويا بيلمهديم. قارشيمدا ديزلري اوسته اوتوروب ديقتله مني سئير ائدن ايكي محبوسا باخيب سوروشدوم: - بو گون آيين نئچهسيدير؟ اورتا ياشلي دئدي: - 11-نجي آيين اوچودور. يئريمده يئنيدن اوزانديم. اوزومو ديوارا ساري دؤندرديم. دئمك حبس اولدوغوم گوندن بئش گون كئچير. ديرناغيملا ديواري جيزديم " صابير 3/11/1355" .
حبسخانانين گونلري ده بؤيوك قاپيسينين آرخاسينداكي دونيانين گونلريندن فرقلي دؤنوردو. گوندوزلری اوزون، گئجهلری داها سسسيزايدي. گنج محبوسون آدي سعيد، اورتا ياشلينين آدي ايسه ريضا ايدي. سعيد معليم ايميش. مكتبده درسدن علاوه سياسي صحبتلر ائديرميش. مكتبين مديري بيليب توتدورموشدو. بير ايل حبسخانادا ايدي، دؤرد ايل ده قالمالي ايدي. ريضا ناموس اوستونده قونشوسونون اوغلونو پيچاقلاميشدي. دامدا قوش بازليق ائدنده بونلارين حيطينه باخيرميش. قوش آدينا ريضانين آروادينا فيشقيراق آتاندا ريضا گؤروب آتاسيندان ياديگار قالميش اوْو پيچاغيني گؤتوروب قونشولارينين قاپيسينا گئدهرک اوغلاني اوچ-دؤرد يئردن پيچاقلاميشدي. اوغلان اؤلسه ايدي هله حبسخانادا قالمالي اولاجاقميش. آللاهدان ساغ قالميشدي. ايكي آيا كيمي حبس مدتي قورتاراجاقميش.
حبسخانا گونلري چوخ گئج باشا چاتيردي. بير گئجه-گوندوز ايييرمي دؤرد ساعات دئييل بير ايل گليردي نظريميزه. ريضا الوان رنگلي مينجيقلار ايله قادين سانجاغي دوزلتمكله بير ايله برابر گونونو كئچيريردي. منسه سؤزلريمه سعيددن باشقا ائشيدن تاپا بيلمزديم. چوخ تمكينلي و ساوادلي گنج ايدي. دوكتور جاويدين آدين ائشيدن كيمي تانيميشدي. اونيوئرسيتئتده صينيف يولداشلاري اولموشدولار. دئييردي: دوكتورون عايلهسي شاهچيدیلار. آتاسي و ياخين قوهوملاري دؤلتين بؤيوك–بؤيوك يئرلرينده ايشلهييرلر. اونا گؤره ده دوكتور اونيوئرسيتئتي بيتيرر-بيتيرمز ساواكا داخيل اولور. بير پسيخولوق كيمي ساوادلي پسيخولوق ايميش، آما اوندان بير ساواك ايشچيسي چيخمازدي. دئديم: - جاويد او ايش سنين اوچون دئييل. چوخ چكمز داغيلارسان اوردا. اورا گئتمك اوچون اورهييني، ويجدانيني آياق آلتیندا قويماليسان. سن كي حقي نا حقه ساتان دئييلسن. بس نئجه داوام گتيرهجكسن؟!. سؤزومه باخمادي. بئله دوشونوردو كي، تك باشينا او بويدا ساواكدا بيرايشلر گؤرهبيلهجك.
دئمك دوكتور ساواك ايشچيسي ايميش. ايكي آي سونرا ريضا حبسخانادان چيخير. ائوين عنوانينی وئريب، اوندان آنامي گؤرمهييني خواهيش ائتديم. گونلرله، آيلارلا گؤزلهسه ايديم ده آنامدان هئچ بير خبر چیخمادي. حبسخانايا باشقا سیاسی محبوسلاردا گتيريليردي. سعيد بالاجا سلولون بير كؤشهسينده هر گون اطرافيمداكي دونيانين يئني بير قارانليق نؤقطهسيني منيم اوچون آيدينلاشديريردي. دوكتور جاويدین آرا- سيرا منيم اوچون دانيشديغي سؤزلرين آنلاميني سعيددن اؤيرهنيرديم. حبسخانادان منه و باشقا محبوسلارا مكتب ياراتميشدي. ايلك دؤنه گؤرنده، چكينديييم ديرناقسيز بارماقلاري داها مقدسلشميشدير منيم اوچون.
ايكي ايل كئچدي. حياتيمين ايكي ايل مكتبلي گونلري. يئني آند ايچميش محبوسلار يئني بير دونياني گؤزلريمده جانلانديريرديلار. حبسخانانين باييريندا ميللتين قانلي مبارزهسي اورهييمي جوشدوروردو. هر آن اوغور قازاناجاقلارينا اينانيرديق. سعيد تئز-تئز سلولدان آپاريليردي و قاييتديقدا يئني بير قهرمان فورماسيندا گؤرونوردو. يارالارينا من مرحم قويارديم. داها دوغروسو اونون يارالاري ايله دانيشا-دانيشا مبارزهنين شيرينليييني داديرديم و بير زامان دوكتور جاويده گؤره حبس اولدوغومو و آناما چكديرديييم آجيلارين هاميسيني اؤزومه قبول ائتديريرديم.
سياسي محبوسلار تئز-تئز ايشكنجه اوتاقلارينا گؤتورولوردولر. حبسخانادا ياراليلارلا مشغول اولاندان بری گونلر داها تئز كئچيردي. خبر گلیر؛ شاه قاچيب. خبردن درحال سونرا ميللت حبسخانايا يوروش ائدير. بوتون سلوللارداكي محبوسلار آزاد ائديلير. سعيد، من و باشقا محبوسلار ميللتين چييينلري اوستونده آزادليغا دوغرو گئديرديك. ايكي ايلدن سونرا، نهايتاً آنامي گؤره بيلرديم. ساعاتلارجا شهرده شادليق ائدندن سونرا محللهنين گنجلري طرفيندن اؤز محللهميزه ساري گؤتورولدوم. يئنه ده محللهیه گیرینجه آنامی گؤزلهيركن گؤرهجکدیم. آنام هر زامانکی کیمی يئنه ده نارین گوللو چادیراسیني باشینا آلیب قاپی آغزیندا دایاناجاقدي و یئنه ده نیسگیل حیسي اورهییمی بورويهجكدي. اوللر هر زامان آنامي كوچهده دايانيب يولومو گؤزلركن گؤرنده بو حيس اورهييمي بورويردي. چوخ آجي و دؤزولمز حيس ايدي. محللهيه گيرديك. باخيشلاريمي اينسانلار توپلوسونون ايچريسيندن قاپيميزا ساري تيكديم. كيميسي قوربانليق كسيردي، كيميسي ده شيرنيات پايلاييردي. اوجادان آنامي سسلهمك ايستهديم. آما سسلهسه ايديم بئله هاي –كويون ايچريسينده ائشيده بيلمزدي. شوبههسيز كي اودا اؤزونو منه ياخينلاشديرماق اوچون اينسانلارين آراسيندان يئر آختاريردي. نه اهالينين شادليغي بيتيردي ندهكي آنام گؤزومه دهييردي. چئورهمي بوروين محللهنين گنجلريندن قاپيميزين قاباغينا آپارمالاريني ايستهديم. چوخ چتينليكله قاپيميزين قاباغينا گلديك. قاپي باغلي ايدي. بويلانيب بير قيراقدا توپلانان قادينلارا باخديم. آنام اونلارين دا ايچريسينده دئييلدي. اليمي آتيب قاپيني دؤيدوم. ندنسه محلله اوشاقلاري مني قاپيدان قيراغا چكمك ايستهييرديلر. اولا بيلردي كي آنام آزاد اولدوغومدان خبرسيز ايدي. قاپيني يئنيدن دؤيدوم. داها محکم دؤيدوم. قاپي آچيلدي. گنج بير قادين قاپيدان باییرا باخدی. محلله اوشاقلارينين بيريسي آغزيني قولاغيما ساري ياخينلاشديريب اوجادان دئدي: - آنان بو ائوي ساتيبدير.
محللهنين اهاليسي چؤرهكچي موروهتين ائوينده توپلاشدی. اونون ائوي محللهدهكي بوتون ائولردن بؤيوك اولدوغوندان هامينين خئير-شر ايشيني او ائوه سالارديلار. اوتاغين لاپ يوخاري باشيندا آغ ساققاللار ايله بير يئرده اوتورتدورولموشدوم. آنامدان خبر آلماق اوچون هر آن فرصت داليسينجا ايديم. اونسوز، آزادليقدان يارانان سئوينجيمي چئورهمدهكيلرله پايلاشا بيلميرديم. آرا ساكيتلشن كيمي بؤيرومده اوتوران آغ ساققاللارين بيريندن آنام حاقدا سوروشدوم. بير قيچيني ديك قويوب، قولونو ديرسكدن اونا داياق وئرهرك همين اليندهكي چرهكهسينين دانالاريني بارماقلاري ايله اويناداراق دئدي: - اوغول! سن يوخ اولاندان سونرا آنان ايمكاني قدهر سني آختاردي. سندن بير خبر آلا بيلمهدييي اوچون ائوي ساتيب ياخشي بير وكيل گؤردو. وكيلدن ده خئيير گلمهدي. فيكيردن يازيق قادينين اورهيي خستهلندي. آغ ساققال بونو دئييب باشيني آشاغي سالدي. اوتاقداكي بوتون محلله اهلي نيگرانلي باخيشلارلا سانكي آغ ساققالين سؤزونون سونونو آنلاديرديلار.
تبريزين سويوق قيش گونلرینین شاختالي هاواسيندا مزارليغين دونموش قبيرلرينين بيرينين قيراغيندا اوتورموشدوم. توند گولاب قوخوسو مزارليغين بلندگوسوندان سسلهنن قوران سسي ايله قاريشميشدي. گولابا بلنميش بير اوْووج تورپاغي مزارين اوستوندن گؤتوروب اييلهديم. آنامين نارين گوللو آغ چاديراسينين قوخوسو بورنومه دهيدي. يايين ايستي گون اورتا چاغلاريندا ياتاندا آنام نارين گوللو آغ چاديراسيني اوستومه چكردي. چاديراني بورنوما توتوب دويونجا اييلهيرديم. گولابلي تورپاق قوخوسو وئرردي.
دکتور دیک یئریندن قالخاراق یومروغونو قالدیریب میزین اوستونه چیرپدی. کیشی یئرینی راحاتلایاراق دئدی: - جناب لاپ ائله وور اللرین پارچالانسین. دئدييیم كيمي يئريوي بيلمهسن بيلديرهرم. يازديقلاريني اينكار ائله. دؤولتينن اويون اويناماق اولماز.
دوکتورون اوزونون قیزارماسی نه قدهر چوخ عصبیلشدییینی، سؤزون قاباغیندا اودوزدوغونو گؤستریردی.
کیشی داوام ائتدی: - منیم حاققیمدا یازدیقلارین محض یالاندیر. یا بونلارا ثبوت گتیریب سهو ائتدیینی دئیهجکسن یادا حاققینی اووجونا قویارام.
دوکتور کیشییه ساری جوموب ایکی اللی اونون یاخاسیندان یاپیشیب سیلکهلهيرك: - زيبيل دئييرسن بس نه واختا جان پ ... لاريزي يودودا بيلهجكسيز؟ - دئدي. یئریمدن قالخیب کیشینی دوکتورون اللریندن چیخاردیب اوفیسدن ائشییه یؤنلندیرديم. قاپینی باغلاییب دوکتورون یانینا قاییتدیم.
- آقای دوکتور باشیوا یامان ایش آچیبسان. - دئیه اونو صندلینده اوتورتدوم.
دوکتورون گؤزلری قیپ قیرمیزی قيزارميشدي. دوشونوردوم ایهر اورادا اولماسایدیم بلکه ده هونکور– هونکور آغلایاجاقمیش. چانتامی گؤتوروب دئدیم: - من داها گئدیم. یئنه ده ایشیز اولسا زنگ ائدرسیز.
اؤزومو بیر آنلیغا دوکتورون یئرینه قویوب اونون نه حالدا اولدوغونو باشا دوشمهیه چالیشیردیم. آما اوندان چوخ اؤزومو دوشونوردوم. بو کیشی دوکتورون اوفیسینی باغلاتدیرارسا ایشسیز قالاجاغام. دوکتورو قورخودوب تکذیبییه یازماغینا راضیلاشدیرسايديلار هر شئي يولوندا اولاجاقدي.
قیشین اورتالاری ایدی. دیزه کیمی قار یاغمیشدی. اوفیسدن چیخیب یاریم ساعات قار آلتیندا قالاندان سونرا اوتوبوس دوشدو. اوتوبوسا مینیب ائوه ساری یوللانديم. کیشینین اوفیسه گلیب هده- قورخو گلديییندن بری قریبه بیر حیس اورهییمی بوروموشدو. تئز – تئز، دانیشدیقلاری سؤزلری آغلیما گتیریب آغیر سنگین ائدیردیم. بو دوکتور هر نه اولسا آنامین سؤزونو یئره سالماییب منی ایشسیزلیکدن قورتاردي. آز پولا ایشلتسه ده ایشسیزلیکدن مین قات یاخشیدیر. آه ... اوفیسی باغلاسالار نئجه اولاجاق؟!
ترلهمیش پنجرهلری سیلیب باییرا باخدیم. تبريزين كوچهلرينه آغ آبباق قار نه قدهر ده ياراشيردي. اؤنوموزدهكي دایاناجاق بیزیم محلهنین دایاناجاغی ایدی. آیاق اوسته دوروب اوتوبوسون قاپیسینا ساری گلدیم. اوتوبوس دایاناجاقدا دایانان کیمی آشاغی دوشوب، قزئت دککهسینین قاباغیندا دايانيب تاختا اوستونده دوزولموش قزئتلرین بؤیوک یازیلاریني گؤزدن کئچیرندن سونرا یولا دوشدوم.
قار یئنه ده اؤز یاغماغیندا ایدی. ساکیت و اؤزونه مخصوص بیر ریتمله گؤیدن یئره دوشوردو. هر داناسی یئره دوشونجه دفعهلرله فیرلانیردی. ائله ساکیت گؤرونوردو کی سانکی بیر آزدان اَرییب یئره جوممایاجاقدی. محلهنین باشیندان بیزیم قاپی یاخشیجا گؤرونر. دؤنوب محللهیه گیرینجه آنامی گؤرهجکدیم. آنام هر زامانکی کیمی نارین گوللو چادیراسیني باشینا آلیب قاپی آغزیندا دایاناراق منی گؤزلهییردی. اورهییمی نیسگیل حیسي بورودو. کؤکسومون اوستو آغیرلادی. ایشسیزلهسه ایدیم، ....! آنامین سسی دالدیغیم فیکیرلرچنبريندن چکیب چیخارتدی. ائوین قاپیسینا چاتمیشدیم. چانتامی الیمدن آلیب بیرلیکده ائوه گیردیک.
گئجه یارییا گلسه ایدی ده من هله یوخلامامیشدیم. پنجرهنین اؤنوندن قونشونون دیواری گؤرونر. یاتاغیمدا اوزانيب، آرخا کوچهدن گلیب گئدن ماشینلارین ایشیقلارینین شووقونو اوزبهاوز قونشونون دیواريندان ایزلهیهرک دوکتور ایله کیشینین آراسیندا کئچن داوا- دالاشین داغینیق صحنهلرینی بئینیمدن کئچیریردیم. بلکه ده کیشینین دئدیکلری سادهجه دوکتورا گؤز قورخوسو وئرمکدن باشقا هئچ بیر شئی دئییلدی. بلکه ده صاباح، ائرتهسی گون و نئچه ایللر و دوکتورون اؤز دئییشینه گؤره، دوکتور ساغ ايکن اونونلا ایشلهیه بیلهجکدیم .
هاچانسا یوخویا گئتدییمی خاطیرلامیرام. اوتاق قاپیسینین آچیلیب باغلانما سسیندن اویانیب تازا چؤرهیین قوخوسونو دویدوم. آنام هر گون سحر تئزدن تازا چؤرهک آلماغا گئدرمیش. بو قوخو نییارانلیق حیسلریمه بَلَشیب هر گونکو دادینی ایتیردی. آنام دهییشدییمی، درد چکدییمی آنلادی. سفرهنین باشیندا اوتوروب هردن بیر گؤز آلتی اللریمی، اوزومو سوزوردو. هردن ده بیر باشینی بولاییردی. قورخدوغوم کیمی اولسا، البته كي آنام بیلهجکدی. تئلفون سسلندی. یئریمدن سیچراییب دستهیی گؤتوردوم. دوکتورون سسی تئلفون آرخاسیندان قولاغیما دهیدی:- اوغلوم بو گون گلمه، بیر آز ایشلریم واردی. آیلیغیوی میزیوین کشووندا بیر پاکاتا قویموشام. بیریسی گون گلنده، من اولماسامدا اوفیسی آچیب گؤتوررسن.
دوکتورون سسی تاماماً دهییشمیشدی. اونون یوموشاق و بیر آز یاواش سسینین تونو بام باشقا اولموشدو. تیترهک سس ایله سؤزون دئییب، دانیشماغيما ماجال وئرمهدن تئلفونو کسدی. یئریمدهجه دستک الیمده قورویوب قالمیشدیم. او منه پولونو گل گؤتور و بیر داها ایش اوچون بورا گلمه دئدیمي، یوخسا....
آنام هر زامانكي كيمي بالاجا یئمک قابیمی چانتاما قویوب قاپی آغزینا کیمی گتیررک یولا سالدی. دوکتورون تئلفون آرخاسیندا نه دئدیینی و ایش یئرینده نلر اولدوغونو آناما دئیه بیلمزدیم. نئچه آی ائوین پول گتیرهنی اولوب، آناما صاحاب چیخمیشدیم. یاشادیغیم بو غورورون داغیلاجاغینی آناما دئمهیه گوجوم یوخ ایدی.
کئچن گون باشا- باش قار یاغسایدی بئله، هاوانین یاغماسی داها کسیلمیشدی و سویوقلوغوندان دا آزالمیشدی. شهرین چئورهسینده اوجالان داغلار آغ آبباق و آیدین گؤرونوردو. اوتوبوسا مینیب شهرین اورتالارینا گئدیب دایاناجاقلارین بیرینده دوشدوم. اوتوبوسدان دوشونجه سویوق بدنیمی گیزیلدتدی. ساغ قولومو گؤزومون قاباغینا گتیریب ساعاتا باخدیم. هر گون بو زامان اوفیسین قاپیسیني آچارام. اؤنجه اوست پالتارلاریمی سویونوب سونرا مطبغه گئدیب ساماواری یاندیرارام. مندن یاریم ساعات سونرا دوکتور گلر. دوکتور زنگین عایلهدن چیخمیش اولسا دا داورانیش و دانیشیق طرزیندن زنگینلردن داها چوخ فرقلنیردی. ائله اونون یانیندا راحات ایشلهمهییمین بیرسببی ده بو ایدی. یوخسول آدام گؤرنده باشینی بولاییب چوخلو– چوخلو چتین معنالی لغتلرله سؤزلر دئیردی. بعضا ده كيميلره سؤيوش وئرردي. من بونلارين هئچ بيريندن باش چيخارمازديم.
آخشاما کیمی شهرده گزدیم. آرادا بیر کافهلره گیریب چای ایچمک آدینا قیزیشیردیم. هر هانسی یانا گئدیب نه ایش گؤرنده یئنه ده دوکتور و کیشی گؤزومون قاباغیندا جانلانیب دارتیشماغا باشلاییردیلار. دئییهسن فیکیرلشمکدن بئینیم شیشمیشدی. باشيم آز قاليردي پارتلاسين.
پارکین چیخیشیندان ساغا دوغرو گئدنده کوچهنین اوبیری الینده، اوفیس گؤرونر. پنجرهدن ایشیقلاری گؤردوکده تعجبلندیم. اورا گئدیب ایچریدن باش چیخارماق ایستهییردیم. دوشوندوم کی دوکتور اوفیسدهدیر.کوچهنی کئچیب اوفیسین بیناسینا یاخینلاشدیم. نئچه دؤنه قاپینی دؤیدوم. کیمسه آچمادی. آچاریمی چیخاریب قاپییا سالدیم. دئیهسن قاپینین ایشگیلینی ایچریدن سالمیشدیلار. آچاری چیخاردیب قاییتدیم. اؤز- اؤزومه دئدیم: - بلکه دوکتور ایچریده یاتیبدیر. بونا گؤره قاپینی دا آچمادی.
قولومداکی ساعاتا باخدیم. هر گون بو ساعاتدا ایشلریمی قورتاریب اوفیسدن چیخاردیم. آرتیق ائوه گئتمک واختی گلمیشدی. بونا گؤره ده هر زامانکی کیمی اتوبوسا مینیب ائوه گئتدیم.
آنام سانکی منی اوخویورموش. اورهییمدن کئچنلری سوروشمادان دویورموش. چانتامداکی یئمک قابیمی ال دهیمهمیش گؤرونجه سوکوتومو پوزوب منی حیسلریمدن چیخاراراق اؤزومه گتیردی. –تورپاغا سانی یاشایاسان، رحمتلیک آتان کیمی هر شئیی اؤز ایچیوه ساليرسان. –دئدی. آنام توختاقلیق وئریرمیش کیمی دانیشدی: آللاه کریمدیر. هرهنین روزوسون او کیشی گؤروب.
بوغازیمی قهرکسدی. دیندیرسه ایدی آغزیمی آچمامیشدان آغلایاجاقدیم. قاپی دؤیولدو، دیندیرمهدی. سرییه ننه بیزه گلنده قوناق اوتاغیندا ساعاتلارجا آنام ایله دانیشاردیلار. گؤزومو آچاندان بری سرییه ننه قونشوموز ایدی. قوجا و مهریبان قادین ایدی. اری اؤلموشدو و اوشاقلارینین دا هامیسی ائولنیب گئتمیشدیلر. هردن ائله صحبته گیریشردیلر کی ائوه بمبادا دوشسه ایدی بیلمزدیلر. بوغازیمین قهری پارتلادی. دویونجا آغلادیم. آنامین جهره اَییریب نئچه تومن پول قازاندیغی گونلری خاطیرلاییب آغلادیم. آتامین هاچان اؤلدویو یادیما گلمزدی. البته آتامین اوزونو آنجاق تاخچامیزدا اولان شکیلده گؤرموشم. آنام دئیر:- ایییرمی ایله یاخین اوولاد صاحابی اولمادیق. سن دوغولونجا دا آتان اؤزونو ان موتلو اینسان سانیردی. دووار اوچوب آلتیندا قالماسایدی سنین بو گونونو ده گؤرردی.
بلکه ده آتام ساغ اولسایدی بو گونومو بئله گؤرمزدی. اوشاقلیغیمدان قالان، آنجاق آنامین چاتلاق اللریندن و جهره جیریلتیلاریندان قیریق خاطیره لردیر کی هر آن عزراییل کیمی حیسلریمه گیرهرک بوغازیمی سیخیردی. قونشولوغوموزداکی یاشیدلاریمی دوشونوردوم. ماتور ایله بوردان اورا، اوردان بورا ایلغیملایاراق گنجلیک آنلارینی یاشاییردیلار و من آتامین یئرینه اونون قوجالیغینی یاشاییردیم . آنامین گون به گون اَرییب کیچیلدیینی گؤرهرک بیر گون داها یوخ اولوب قورتارماق قورخوسوندان گئجهلر نئچه یول یوخودان داشلاناردیم. بو اوزدن کیمسهدن ائشیتمهسه ایدیم ده اؤزومو یاشلانمیش بیری سانیردیم. گوزگوده گؤز ببکلریمین ان درینلیکلرینه جوموب ائله بیر کدر و دورغونلوق حیس ائدیردیم کی اونلاردا بعضا اؤزوم ده اؤزومه کؤورهلیب نئجه آجی بیر طالعه صاحیب اولدوغوما گؤره تاسسوف ائديرديم. او آخشام بونلارین هامیسینی یادیما سالیب آغلادیم.
سحر چاغی هر زامانکی گونلردن داها تئز یوخودان دوردوم. داها دوغروسو گئجهنی یاخشیجا یاتا بیلمهمیشدیم و سحره کیمی گاه اویانیب گاه یاتیردیم. " او گون تئلفوندا دوکتور نه دئمک ایستهییردی؟ ندن منی دانیشماغا قویمادی.؟" و بونلارا بنزر نئچه – نئچه سورغولار بئینیمه جوموب منی اؤزونه مشغول ائدیردی. ساعات 8 ایدی. اوتوبوس، اوفیس اولان کوچهنین دایاناجاغیندا دایاندی. اوتوبوسدان دوشوب دایانمادان بیر باشا اوفیسه دوغرو یوللاندیم. پیلله یوللاری هر گونکو کیمی سوپورولموشدو و هر شئی سانکی اؤز قایداسیندایدی. پیلله لردن یوخاری چیخدیم. بیرینجی مرتبه، ایکینجی مرتبه و سونرا ایسه اوچونجو مرتبه. بیزیم اوفیس اوچونجو مرتبهده ایدی. قاپینین اؤنونه چاتینجا الیمی جئبیمه سالیب آچاری چیخارتديم. آچاری قاپییا یاخینلاداراق یئریمدهجه قورویوب قالدیم. قاپی پولومپلانمیشدی.
کوچهنی آددیملایاراق آياقلاريمي یئرده یوخ، هاوادا بیلیردیم. دایانمادان شهری آددیملاریم آلتینا سالمیشدیم. نه سویوغو بیلیردیم نه ده هارادا اولدوغومو. بیر آندا اؤزومو ائوین قاپیسیندا گؤردوم. آنام چرهکهسینی الینه آلیب اونون دانالارینی بارماقلاری ایله او یان بو یانا وئرهرک دیل دوداغی آراسیندا نلرسه دئییردی. اوتاغا گیریب قاپی آغزیندا یئره اوتوردوم. آنام باشینی قالدیریب منه باخدی. – یازیق یاخشی آدام ایدی.- دئدی.
دئدیم: - کیم؟
دئدی: - دوکتور جاوید دا.
سوروشدوم:- سن اوفیسین جریانین هاردان بیلدین آنا؟
آیاغا دوروب تاخچادان بیر پارچا کاغیذی گؤتوروب منه دوغرو گتيردي.
- باققال حسین بو گون بونو گتیريب. یازیق اؤزون آسمیشدی.
کاغیذی آلیب باخدیم. یاس تؤرهنینین اعلامیهسی ایدی. آنامدان بیر سؤز سوروشمادان قورویوب کاغیذا باخدیم .
دوکتورو تورپاغا باسديرديق. هلهده گیجلیکدن چیخمامیشدیم. ایشیمين فیکیری و آیلیغیمین الیمه گلیب – گلمهیهجهیی، منی بیر آن دا اولسون بئله راحات بوراخمیردی.
آرتیق ياس بیتمیشدی. ائوده یورقونلوغومو چیخاریردیم. قاپی دؤیولمهیه باشلادی. آنام قاپینی آچدی. بیر کیشی سسی دویولدو: – آقای صابیر سلطانی گیلین ائوی دیر؟
اوتاقدان چیخیب آنام بیر سؤز دئمهمیشدن اوجا سسله اونون جوابینی وئردیم:- بلی بورادیر . بیر دهیقه!
قاپی آرخاسیندا پلیس مامورو ایدی. گؤرونجه ال- آیاغیم تیترهمهیه باشلادی. – بوُیورون سرکار.- دئدیم. دئدی: - دکتورون اؤلومو بیزه گؤره شوبههلی اؤلومدور. بونا گؤره ده اؤلومون دلیلینی آیدینلاشدیرماق ایستهییریک. او نئجه آدام ایدی؟ دشمنی زادی یوخ ایدی کی؟
دئدیم: - دوکتور چوخ یاخشی آدام ایدی. اونون دوشمنی سانیرام کی هئچ یوخ ایدی. آما سون گون بیر کیشی اوفیسه گلیب دوکتور ایله دانیشیب هده – قورخو گلندن سونرا گئتدی.
پليس دئديكلريمي دينلهييب اليندهكي كاغيذلارا نلرسه يازيردي. ايكي گون سونرا ساعات 9- دا محللهنین کلانتریسینه گئديب ایفادهنی تکمیل ائتمهييمي دئييب گئتدي.
کلانترییه گئديب ایفاده وئرمکدن او قدهر قورخماسایدیم دا آنامین سیزیلدایاراق قورخمالی یوْروملاری اورهییمی اوزوردو. سانکی بیر شئیلرين اولاجاغي آنامین اورهیینه داممیشدی. اوتوروب – دوروب دئییردی:- آی بالا آللاه ائلهمهميشدن دوکتورون اؤلومون سنین باشیوا سالارلار.
قورخدوغومو گیزلهدهرک گولومسهییب دئییردیم: - یوخ آنا . بئله اؤلوملرده، اؤلونون اطرافینداکیلاردان سورغو سوال ائلهیرلر.
آرتیق بیر گوندن سونرا کلانترییه گئتمهلییدیم. سون گون اوفیسده نلر اولدوغونو و او کیشی ایله دوکتورون آراسیندا دئییلن سؤزلری اؤز بئينيمده سالیب چیخیردیم. تئلفونون زنگی سسلندی. دستهیی گؤتوروب دانیشماغا باشلادیم. تئلفون آرخاسیندان بیر کیشی سسی گلیردی:- آقای صابیر سلطانی؟!
- بلی، بویورون، اؤزومم.
- سنی گؤرمهلییم. دوکتور حاقدا مهم سؤزوم وار سنه. هاردا سنی گؤره بیلرم؟
همین گون ساعات 3-ده اوفیسین اوز به اوزوندهکی پارکدا گؤروش قراری قویدوق. سوروشدوم:- سیزی نئجه تانییاجاغام؟
دئدی:- من سنی گؤرونجه تانییارام. ائله سنده منی تانییاجاقسان.
کیشینین سون سؤزو منی دوشوندوردو. تانیش اولماسا نئجه اونو تانییا بیلرم. بونا گؤره مشتریلریمیزدن بیری اولدوغونو ساندیم .
اوفیسین اوزه به اوزوندهکی پارک چوخ کیچیک ایدی. بو باشیندان او بیری باشینا گئتمک اوچون سادهجه ايكي دهیقه یول گئتمهلییدیم. نئچه دؤنه پارکین اولیندن آخیرینا کیمی دولاندیم. تانیدیغیم بیر کیشی گؤرمهدیم. ساعاتا باخدیم. قراردان آرتیق اون دهیقه ده کئچمیشدی. بیری آرخادان منی سسلهدی. دؤندوم. گؤرونجه تانیدیم. اوفیسده دوکتور ایله دالاشان کیشی ایدی. سالام وئرهرک الینی اوزاتدی. الیندن توتوب سالامینی آلدیم. اورداجا سؤزونو دئمهیه باشلادی: -آقای سلطانی، دوکتوردان باشلادیغیم بیر ایشی سیزده قورتارماق ایستهییرم.
تئز سوروشدوم:- نه ایشی؟
دئدی:- ائشیتمیشم پلیس قاپیزا گلمیشدی. منیم حاققیمدا اونلارا بیر سؤز دئسن باشینی بلایا سوخا بیلرسن.
ال- آیاغیم تیترهمهیه باشلادی. دیلیم توتار- توتماز دئدیم: - نه... یه ... کی؟!
سسینی محکملندیرهرک :- اوراسی دا سنه مربوط دئییل. دیری قالیب آناوی آغلار قویماق ایستهمهسن، کلانترییه گئدیب اونلارا منیم حاققیمدا دئدیکلرینی تکذیب ائتمهلیسن. بئله ائتسن، بؤیوک مبلغده پول آلیب راحات یاشایاجاقسان یوخسا دوکتورون باشینا گلن سنین ده باشیوا گله بیلر. کیشی قطعیتله دانیشيردی. دوکتورو، قارشیمدا منه قورخو گلن بو کیشینين اؤلدوردویونه داها دا شوبههلنديم.
دانیشماغا اینجاریم یوخ ایدی. دیلیم قورخودان باتمان داشینا دؤنموشدو. اونا آغلاییب یالوار یاخارماغا بئله ایمکان تاپمادیم. سؤزلرینی دئین کیمی آیریلیب گئتدی. دانیشیغیمیز بئش دهیقه بئله سورمهدی. بو آز واختدا، دونیا بویدا آغیرلیغی یوک کیمی بوینوما ییخدی. کیشی گئتدی و منه بؤیوک بیر قورخوکؤلگهسی بوراخدی. آرتیق نه ائدهجهییمی بیلمهییردیم . دوغرو دئسم اؤله بیلرم، یالان دئسم ده اورهییم ساکیت قالماز بلکه ده زیندانا دوشه بیلرم، بلکه ده قانون یالان معلوماتیما گؤره باشقا جور جزالاندیرسین. ایکی قارانلیق یولون اورتاسیندا ایشیق یولو تاپماق اوچون چابالاییردیم. بیری تام یوخ اولماغیما چاتیردی بیریسینین ده سونو هله کی بللی دئییلدی. اوچونجو یول ایسه عاغلیما چاتمیردی. آناملا مصلحتلشسه ایدیم یازیغین اورهیینی اوزه بیلردیم. او گون کیشینین قاباغیما قویدوغو یوللاری نئچه دؤنه اینجهلهییب دوشوندوم. آلا بولا فیکیرلر سارماشیق کیمی بئینیمی بوروموشدو. سونوندا کیشییه بویون اَیمهییمه قرار وئردیم.
آنام قاپی آغزیندا دوروب قورانی قاپینین باشیندا ساخلادی. اوچ دؤنه قاپیدان گیریب چیخدیم . – سنی آللاها تاپیشیردیم اوغول، سن حاققینان اول، حاق سنینلهدیر. - دئینده، توتدوغوم فیکیر داش کیمی بئینیمه چیرپیلدی. کیشینین دئدییینه بویون اَیهجکدیم آنامین سؤزو قاباغیمی آلدی. داها دوشونمهدیم. نه اولاجاق اولسون ! - دئییب کوچهیه چیخدیم. سویوقدان یئر بوز باغلامیشدی. محللهنین دؤنومو داها سوروشکن ایدی. احتیاطلا محللهدن چیخاندا بیریسی یول قیراغیندان منی سسلهدی. اوفیسده اولان کیشی ایدی. قارا رنگلی بیر آرابادا اوتورموشدو. مینمهییمی ایستهدی. مینمهیینجه الینی یاواشجا منه گؤستردی. الیندهکی توپانچانی گؤروب ماشیندا اوتوردوم. کیشی ماشینی سرعتله محللهدن چیخاردیب یاخینلیقدا اولان پارکین قیراغیندا دایاندیردی. اؤزومو محکم توتموشدوم. قورخدوغومو اونا هئچ بللی ائتمهمهلییدیم. کیشی غرورلو و تكبورلو سس ايله دانيشماغا باشلادي. البته ائله اونو تانيياندان سس تونو بئله ايدي. – دئ گؤروم سؤزلريمين اوستونده فيكيرلشدين؟
- هه، فيكيرلشديم.
- حتما دئديييمه باخاجاقسان.
- يوخ! گئديب هر شئيي پليسه دئيهجهيم.
- سن دئ، گؤر نه اويون آچارام باشيوا.
ماشینین قاپيسیني آچيب باييرا چيخديم. پنجرهسيندن كيشينين اوزونه باخاراق:- يوخاري باشي، قورو جانيمي آلاجاقسان دا. من يالان دانيشا بيلمهرم.- دئییب یولا دوشدوم.
کلانتریده دوکتورون پروندهسي ایله یوغون چال پئر بیر پلیس ماراقلانیردي. بونو اوتاقلارین بیرینده اوتوران پلیسين ديليندن ائشيتديم. اوتاغین او بیری باشیندا میز آرخاسیندا، تئلفون ایله دانیشان یوغون چال پئر پلیسه باخاراق اونون یانینا گئتمهييمی دئدی. احتیاطلی آددیملارلا پليسه یاخینلاشیب، میزینين قیراغینا سؤیکهنهرک دوردوم. پلیس دستهیی قویدو.
- جناب سرکار، دوکتور جاویدین پروندهسینه گؤره منی چاغیرمیشدیز. –دئدیم.
پلیس اوزومه باخاراق بیغینین بیر اوجونو دیشلرینین آراسینا سالیب چئینهیهرک دئدی:- هه ! سن اونون نهییسن؟
- جناب سرکار، دفترینده ایشلهییردیم.
- پرونده باغلانیب . سنده چیخ گئت. - دئدی.
اودقوناراق قورخودان قورویان بوغازیمی بیر آز یوموشاتدیم. – ائئئئئئئ آخی دئييرديلر، اؤلدوروبلر؟!
پلیس اوزونون ایفادهسینی آنیجه دهییشدیریب عصبی بیر حالدا اوجادان باغیراراق دئدی:- اولان اؤزو اؤزونو اولدوروب. چیخ گئت، بیردونیا ایشیمیز واردی.
پلیسین چیغیرماسی ایله یئریمدن داشلاندیم. – بلی - بلی. اللریز آغریماسین. - دئییب اوتاقدان چیخدیم.
دئمک دوکتور اؤلدورولمهمیشدی. بونو پلیسدن دویدوم. بیر گئجهنین ایچینده، نلر اولموشدو؟ بیر پلیس قاپییا گلیب دانیشماغیمی ایستهییر. دوکتورلا دالاشان کیشی گلیب قاتیل اولدوغونو دئییر و مندن ده اونا بویون اَیمهییمی ایستهییر و سونرا پليس پروندهني باغلاياراق هر شئيي بيتميش سانير.
یولون اورتاسیندا دایاندیم. آنام دئمیشدی؛ من حاق ایله اولسام حاق دا منیمله اولاجاقدیر. شوبههسیز كي بو بئله اولمالییدی. آنام بوشو-بوشونا دانيشمازدي. هر شئيدن خبري اولاردي. قئيبدن بيلرميش کیمی دانیشاردی. اؤز دئييشينه گؤره، اورهيي خبر وئررميش. بیر داها کلانترییه دؤندوم. یوغون و چال پئر پلیسین میزینین باشینا گئتدیم. هر نهیی اونا دئمهیی دوشونوردوم. اولدن آخیرا کیمی دئدیم. سرعتله دئییب او هیرسلنمهدن سؤزومو قورتاردیم. پلیس یئریندن قالخیب اوزومه سیللی آتالی چوخ آنیجه اولدو. نه زامان آیاغا دوروب و سیللی آتدیغینی بئله دویمادیم. ایچیمی چکیب سؤزومو دایاندیردیم. پلیس، میزین اوستوندهکی تلفونون دستهیینی قالدیردی. بیر-ایکی رقملی نمرهنی ییغیب گؤزلهدی. بیر آزدان دانیشماغا باشلادی: - تیمسار سلام! سؤزون دوزو، دوکتور جاویدین همکاری بوردادیر. دئییر، دوکتورو اؤلدوروبلر.
پلیس تئلفونون او بیری طرفینده اولانین سؤزونه قولاق وئره – وئره اوزومه باخدی. سونرا ساغاوللاشیب دستهیی تئلفونون اوستونه قویوب اوجادان کاریدوردا دوران عسگری چاغیردی. عسگر سرعتله اوتاغا گیریب پلیسه سایغی گؤسترمک علامتی اولاراق ساغ آیاغینی یئره چیرپیب، دوز دایاندی.
- بو اوغلانی ایچری سال.
عسگر يئنيدن ساغ آياغيني يئره چیرپاراق الینی قولوما سالیب، یئریمدن قالدیردی.
- جناب سرکار آخی منیم گوناهیم یوخدور کی. - هيجانلا دئدیم.
سؤزومه باش قوشماییب الیندهکی پروندهيه باخیردي. عسگر منی اوتاقدان چیخاریب، کاریدورون سونونداکی قاپینی آچیب ایچری ایتهلهیهرک یئنیدن قاپینی باغلادی.
آخشام ساعاتلاريندا قارانليق و شئحدن نموولانميش اوتاغين قاپيسي آچيلدي. كاريدورون ايشيغي گؤزومو قاماشديردي. گؤزلريمي آچيب ياخشيجا باخا بيلمهديم. بيريسي دستمال ايله گؤزلريمي باغلادي. سونرا ايسه اللريمي آرخادان باغلاييب ايتهلهيهرك قاباغا گئتمهييمي ايستهدي. تئز-تئز هارا آپاراجاقلاريني و نه اوچون بئله داورانمالارينين ندنين سوروشوردوم. هر دفه ده يومروق و شيلله ايله جاواب آليرديم. ماشينا مينديريلديم. ماشين بوروق – بوروق يوللاري كئچيب نهايت، بير يئرده داياندي. هارا گئتدييمي بيلميرديم. شاشقينليقلا آنجاق گؤزلهييب ايشين سونونو گؤرمهلييديم. بو آرادا اؤزومدن چوخ آنامي دوشونوردوم. يقين قاپي آغزيندا دايانيب كوچهنين باشيندان محللهيه گيرمهييمي گؤزلهييردي.
صندلين اوستونده اوتورتدوروب گؤزلريمي آچديلار. داراجيق، آزجا دا قارانليق بير اوتاق ايدي. آنجاق تاوانين اورتاسيندان آشاغي طرفه ساللانان لامپانين ايشيغي ايله ايشيقلانديريلميشدير. بير آزدان قاپي آچيليب تميز گئييملي، كيراواتلي كيشي ايچري گيردي. اورتا بويلو، بير آزدا كؤك ايدي.
آدیم، سوي آدیم، آتامین آدي، دوغوم ايلي، دوغوم يئري و منه عايد اولان بوتون معلوماتيمي سوروشدو. آغزيمدان چيخان هر شئيي گؤزلريمي آچان كيشي يازيردي. سونرا دوكتور جاويد حاقدا سوروشدو:- دوكتور جاويدي سن اؤلدوروبسن؟
- يوخ من نهيه اؤلدوروم كي؟! دوكتور اؤلمهميشدن بير گون قاباق اوفيسينده بير كيشي طرفيندن هدهلنميشدي. اولا بيلسين كي او اؤلدوروب.
دوكتورلا كيشي حاقدا بيلديكلريمين هاميسيني دئديم.
تميز گئييملي كيشي امینلیکله دئدی: - سن همين گون اوفيسين قاپيسين آچميشدين. بارماق ايزلرين قاپينين اوستوندهايدي. آرتيق سنين قاتيل اولدوغونو بيليريك. اعتراف ائتسن هر شئي يولونا گيرر. يوخسا ....
بوتون بدنيمي آغري بوروموشدو. آياقلاريمي باغلاييب آلتينا شاللاق وورودولار. آنجاق آنامين سؤزونه گؤره دايانميشديم. دؤزوموم قورتاريب بوينوما آلماق ايستهينده آنام گؤزومون قاباغينا گليردي. من حاق ايله اولسام حاق دا منيمله اولاجاقدير. نه قدهر ده ايشكنجه وئرسهلر بوينوما آلماياجاقديم.
نئچه گون ايچريده اولدوغومو بيلميرديم. يارالاريمین آغريسيندان اؤزومه قيوريليرديم. اوتاغين قاپيسي آچيلدي. ايكي عسگر و تميز گئييملي كيشي ايچري گيرديلر. عسگرلردن مني گؤتوروب حبسخانايا كؤچورمهلريني ايستهدي. عسگرلرين بيري ساغ قولوما بيريسي ده سول قولوما گيريب يئردن قالديراراق كاريدورا چيخارديلار. آياقلاريمي يئره باسديقدا شيشميش قابارلاري دئشيليردی.
ساغ-سولومداكي ايكي عسگر و حاققيمدا قورولان بؤيوك بير دوسييا ايله بيرليكده حبسخانايا گؤندهريلديم. اورا آياق باسان باشقا محكوملاردان فرقلي اولاراق منيم گوناهيم گوناهسيزليغيم ايدي. مني اورادا باشقا بير حيات گؤزلهدييینه اينانيرديم. آما همین باشقا حياتين نئجه اولدوغونو بيلميرديم. سلوللارين بيرينين قاپيسي آچيلدي. عسگر مني ايچرييه طرف ايتهلهدي. سلولداكي ايكي كيشي بيزي گؤروب آياغا دوردولار. بيري گنج، بيريسي ده اورتا ياشلي ايدي. سلولون قاپيسي باغلاندي. ايكي محبوس مني توتوب يئرده اوتورتدولار. گؤزلریم قارالدی و داها نه اولدوغونو بيلمهديم.
گؤزلريمي آچيب اطرافيما باخدیقدا همين ايكي محبوسوگؤردوم. اوزومه باخيرديلار. اورتا ياشلي محبوس ديزلري اوستونده منه ساري سورونوب: - خوش گلميسن اوغول! – دئدي.
من خوش گلميشديم. يئني دونياما، يئني حياتيما، يئني ائويمه خوش گلميشديم. هئچ كيم بيلمهدن گلميشديم. گلديييم دونيامدان، آنامدان خبرسيز گلميشديم. نهيه گلدييمي نه اوچون گلدييمي بيلميرديم. آنجاق بير داوا صحنهسينين شاهيدي اولدوغوم اوچون بورالارا گليب چاتديغيمي بيليرديم. ياتديغيم يئردن قالخيب اوتوردوم. آديمي سوروشدولار. – صابير سلطاني. گوناهيم: - بير داوا صحنهسينين شاهيدي اولموشام.
باشيمي ديوارا داياديم. قارشيمداكي ديواردا جيزيلميش يازيلاري اوخودوم. "سعيد 1330" يازينين قالانيني ياخشيجا اوخويا بيلمهديم. قارشيمدا ديزلري اوسته اوتوروب ديقتله مني سئير ائدن ايكي محبوسا باخيب سوروشدوم: - بو گون آيين نئچهسيدير؟ اورتا ياشلي دئدي: - 11-نجي آيين اوچودور. يئريمده يئنيدن اوزانديم. اوزومو ديوارا ساري دؤندرديم. دئمك حبس اولدوغوم گوندن بئش گون كئچير. ديرناغيملا ديواري جيزديم " صابير 3/11/1355" .
حبسخانانين گونلري ده بؤيوك قاپيسينين آرخاسينداكي دونيانين گونلريندن فرقلي دؤنوردو. گوندوزلری اوزون، گئجهلری داها سسسيزايدي. گنج محبوسون آدي سعيد، اورتا ياشلينين آدي ايسه ريضا ايدي. سعيد معليم ايميش. مكتبده درسدن علاوه سياسي صحبتلر ائديرميش. مكتبين مديري بيليب توتدورموشدو. بير ايل حبسخانادا ايدي، دؤرد ايل ده قالمالي ايدي. ريضا ناموس اوستونده قونشوسونون اوغلونو پيچاقلاميشدي. دامدا قوش بازليق ائدنده بونلارين حيطينه باخيرميش. قوش آدينا ريضانين آروادينا فيشقيراق آتاندا ريضا گؤروب آتاسيندان ياديگار قالميش اوْو پيچاغيني گؤتوروب قونشولارينين قاپيسينا گئدهرک اوغلاني اوچ-دؤرد يئردن پيچاقلاميشدي. اوغلان اؤلسه ايدي هله حبسخانادا قالمالي اولاجاقميش. آللاهدان ساغ قالميشدي. ايكي آيا كيمي حبس مدتي قورتاراجاقميش.
حبسخانا گونلري چوخ گئج باشا چاتيردي. بير گئجه-گوندوز ايييرمي دؤرد ساعات دئييل بير ايل گليردي نظريميزه. ريضا الوان رنگلي مينجيقلار ايله قادين سانجاغي دوزلتمكله بير ايله برابر گونونو كئچيريردي. منسه سؤزلريمه سعيددن باشقا ائشيدن تاپا بيلمزديم. چوخ تمكينلي و ساوادلي گنج ايدي. دوكتور جاويدين آدين ائشيدن كيمي تانيميشدي. اونيوئرسيتئتده صينيف يولداشلاري اولموشدولار. دئييردي: دوكتورون عايلهسي شاهچيدیلار. آتاسي و ياخين قوهوملاري دؤلتين بؤيوك–بؤيوك يئرلرينده ايشلهييرلر. اونا گؤره ده دوكتور اونيوئرسيتئتي بيتيرر-بيتيرمز ساواكا داخيل اولور. بير پسيخولوق كيمي ساوادلي پسيخولوق ايميش، آما اوندان بير ساواك ايشچيسي چيخمازدي. دئديم: - جاويد او ايش سنين اوچون دئييل. چوخ چكمز داغيلارسان اوردا. اورا گئتمك اوچون اورهييني، ويجدانيني آياق آلتیندا قويماليسان. سن كي حقي نا حقه ساتان دئييلسن. بس نئجه داوام گتيرهجكسن؟!. سؤزومه باخمادي. بئله دوشونوردو كي، تك باشينا او بويدا ساواكدا بيرايشلر گؤرهبيلهجك.
دئمك دوكتور ساواك ايشچيسي ايميش. ايكي آي سونرا ريضا حبسخانادان چيخير. ائوين عنوانينی وئريب، اوندان آنامي گؤرمهييني خواهيش ائتديم. گونلرله، آيلارلا گؤزلهسه ايديم ده آنامدان هئچ بير خبر چیخمادي. حبسخانايا باشقا سیاسی محبوسلاردا گتيريليردي. سعيد بالاجا سلولون بير كؤشهسينده هر گون اطرافيمداكي دونيانين يئني بير قارانليق نؤقطهسيني منيم اوچون آيدينلاشديريردي. دوكتور جاويدین آرا- سيرا منيم اوچون دانيشديغي سؤزلرين آنلاميني سعيددن اؤيرهنيرديم. حبسخانادان منه و باشقا محبوسلارا مكتب ياراتميشدي. ايلك دؤنه گؤرنده، چكينديييم ديرناقسيز بارماقلاري داها مقدسلشميشدير منيم اوچون.
ايكي ايل كئچدي. حياتيمين ايكي ايل مكتبلي گونلري. يئني آند ايچميش محبوسلار يئني بير دونياني گؤزلريمده جانلانديريرديلار. حبسخانانين باييريندا ميللتين قانلي مبارزهسي اورهييمي جوشدوروردو. هر آن اوغور قازاناجاقلارينا اينانيرديق. سعيد تئز-تئز سلولدان آپاريليردي و قاييتديقدا يئني بير قهرمان فورماسيندا گؤرونوردو. يارالارينا من مرحم قويارديم. داها دوغروسو اونون يارالاري ايله دانيشا-دانيشا مبارزهنين شيرينليييني داديرديم و بير زامان دوكتور جاويده گؤره حبس اولدوغومو و آناما چكديرديييم آجيلارين هاميسيني اؤزومه قبول ائتديريرديم.
سياسي محبوسلار تئز-تئز ايشكنجه اوتاقلارينا گؤتورولوردولر. حبسخانادا ياراليلارلا مشغول اولاندان بری گونلر داها تئز كئچيردي. خبر گلیر؛ شاه قاچيب. خبردن درحال سونرا ميللت حبسخانايا يوروش ائدير. بوتون سلوللارداكي محبوسلار آزاد ائديلير. سعيد، من و باشقا محبوسلار ميللتين چييينلري اوستونده آزادليغا دوغرو گئديرديك. ايكي ايلدن سونرا، نهايتاً آنامي گؤره بيلرديم. ساعاتلارجا شهرده شادليق ائدندن سونرا محللهنين گنجلري طرفيندن اؤز محللهميزه ساري گؤتورولدوم. يئنه ده محللهیه گیرینجه آنامی گؤزلهيركن گؤرهجکدیم. آنام هر زامانکی کیمی يئنه ده نارین گوللو چادیراسیني باشینا آلیب قاپی آغزیندا دایاناجاقدي و یئنه ده نیسگیل حیسي اورهییمی بورويهجكدي. اوللر هر زامان آنامي كوچهده دايانيب يولومو گؤزلركن گؤرنده بو حيس اورهييمي بورويردي. چوخ آجي و دؤزولمز حيس ايدي. محللهيه گيرديك. باخيشلاريمي اينسانلار توپلوسونون ايچريسيندن قاپيميزا ساري تيكديم. كيميسي قوربانليق كسيردي، كيميسي ده شيرنيات پايلاييردي. اوجادان آنامي سسلهمك ايستهديم. آما سسلهسه ايديم بئله هاي –كويون ايچريسينده ائشيده بيلمزدي. شوبههسيز كي اودا اؤزونو منه ياخينلاشديرماق اوچون اينسانلارين آراسيندان يئر آختاريردي. نه اهالينين شادليغي بيتيردي ندهكي آنام گؤزومه دهييردي. چئورهمي بوروين محللهنين گنجلريندن قاپيميزين قاباغينا آپارمالاريني ايستهديم. چوخ چتينليكله قاپيميزين قاباغينا گلديك. قاپي باغلي ايدي. بويلانيب بير قيراقدا توپلانان قادينلارا باخديم. آنام اونلارين دا ايچريسينده دئييلدي. اليمي آتيب قاپيني دؤيدوم. ندنسه محلله اوشاقلاري مني قاپيدان قيراغا چكمك ايستهييرديلر. اولا بيلردي كي آنام آزاد اولدوغومدان خبرسيز ايدي. قاپيني يئنيدن دؤيدوم. داها محکم دؤيدوم. قاپي آچيلدي. گنج بير قادين قاپيدان باییرا باخدی. محلله اوشاقلارينين بيريسي آغزيني قولاغيما ساري ياخينلاشديريب اوجادان دئدي: - آنان بو ائوي ساتيبدير.
محللهنين اهاليسي چؤرهكچي موروهتين ائوينده توپلاشدی. اونون ائوي محللهدهكي بوتون ائولردن بؤيوك اولدوغوندان هامينين خئير-شر ايشيني او ائوه سالارديلار. اوتاغين لاپ يوخاري باشيندا آغ ساققاللار ايله بير يئرده اوتورتدورولموشدوم. آنامدان خبر آلماق اوچون هر آن فرصت داليسينجا ايديم. اونسوز، آزادليقدان يارانان سئوينجيمي چئورهمدهكيلرله پايلاشا بيلميرديم. آرا ساكيتلشن كيمي بؤيرومده اوتوران آغ ساققاللارين بيريندن آنام حاقدا سوروشدوم. بير قيچيني ديك قويوب، قولونو ديرسكدن اونا داياق وئرهرك همين اليندهكي چرهكهسينين دانالاريني بارماقلاري ايله اويناداراق دئدي: - اوغول! سن يوخ اولاندان سونرا آنان ايمكاني قدهر سني آختاردي. سندن بير خبر آلا بيلمهدييي اوچون ائوي ساتيب ياخشي بير وكيل گؤردو. وكيلدن ده خئيير گلمهدي. فيكيردن يازيق قادينين اورهيي خستهلندي. آغ ساققال بونو دئييب باشيني آشاغي سالدي. اوتاقداكي بوتون محلله اهلي نيگرانلي باخيشلارلا سانكي آغ ساققالين سؤزونون سونونو آنلاديرديلار.
تبريزين سويوق قيش گونلرینین شاختالي هاواسيندا مزارليغين دونموش قبيرلرينين بيرينين قيراغيندا اوتورموشدوم. توند گولاب قوخوسو مزارليغين بلندگوسوندان سسلهنن قوران سسي ايله قاريشميشدي. گولابا بلنميش بير اوْووج تورپاغي مزارين اوستوندن گؤتوروب اييلهديم. آنامين نارين گوللو آغ چاديراسينين قوخوسو بورنومه دهيدي. يايين ايستي گون اورتا چاغلاريندا ياتاندا آنام نارين گوللو آغ چاديراسيني اوستومه چكردي. چاديراني بورنوما توتوب دويونجا اييلهيرديم. گولابلي تورپاق قوخوسو وئرردي.