چاغداش قادین شعری - 1

[سعید موغانلی]

لیلی کحالی
نقاش- شاعیر- مترجم- آراشدیریجی
1356/ زنگان / یوکسک لیسانس- فلسفه- تهران اونیوئرسته سی
شاعیر، رسّام، چئویرمن و ادبیات آراشدیریجیسی لیلی کحالی 1356-جی ایلین بهمن آیینین بیرینجی گونو قیزیل آذربایجان آدلانان زنگین زنگانین آنا قوجاغیندا دونیایا گؤز آچمیشدیر.
ایلک تحصیلاتینی اؤز دوغما شهرینده باشا یئتیرمیش، اورتا تحصیلاتی زامانیندان عایله سی ایله بیرلیکده تهران شهرینه کؤچموشلر و قالان بوتون تحصیلاتینی ائله بو شهرده باشا چاتدیرمیشدی.
او غرب فلسفه سی اوزره لیسانس و یوکسک لیسانسینی تهران اونیوئرسیته¬سینده باشا یئتیرمیش و ائله فلسفه ایله بیرگه بو شهرده رساملیق هونرینه مئیل گؤسترمیش و یوکسک باجاریقلا رسّاملیغین بوتون گؤزللیکلرینی منیمسه¬میش و اؤلکه¬میزین قدرتلی و اینجه روحلو رسّاملاریندان بیری اولموشدور.
اونون ماراق دوغوران بیر نئچه نقّاشلیق سرگی¬سی تهران گالری¬لرینده نمایشه قویولموش و متخصص¬لر طرفیندن بَیه¬نیلمیشدیر. هابئله او حال حاضیردا تورکیه چاغداش شعر آنتولوژی¬سینی آراشدیریب و توپلاماقدادیر. اونون چالیشیغی ایله تورکیه شعریندن ابراهیم صدری، اورخان ولی و ناظیم حیکمت-ین سئچیلمیش شعرلری ایشیق اوزو گؤرمکده¬دی و هابئله اونون آذربایجان جمهوریّتیندن بیر نئچه اثری یاخین گله¬جکده یاشماق طرفیندن یایینلاناجاق. اونون شعرلری یارپاق و یاشماق درگی¬لرینده و هابئله «باش چیخاران اؤلوم» و «قیزیل آلمالار» شعر آنتولوژی¬لرینده یایینلانمیشدیر.
لیلی خانیم کحالی¬نین اؤتن ایللرده اوشاق¬لار ادبیاتی اوزره چالیشمالاری نتیجه¬سینده (قولئیبانی) افسانه¬سی اوشاق شعرلری اندیشه¬ی نو یایین ائوی طرفیندن یایینلانمیش¬دیر. شاعیرین چاغداش قادین دویغولو شعر توپلوسو یاخین گله¬جکده یاشماق سیرا کیتاب¬لاریندان یایینلاناجاق.
 
1.
من او قوشو اؤلدورموشم،
من او قوشو
دیمدیگینده غزل قوشو
من او قوشو
باخیشیندا سئوگی قوشو
من او قوشو...
من او قوشو اؤلدورموشم
سینه¬مده یوواسی واردی
سئوگی یئرینه قان ایچدی
قانادلاری قانا دوشدو
دوشدو قالدی سینه م اوسته
ایچیمده کی آرزی قوشو
من اؤلدورموشم
من او قوشو...
 

2.
یاغیش یاغیر
ساعاتلاردیر
دامجی-دامجی باخیشلارین
پنجره لرده داغیلیر
هرنه خاطیره میز واردی
سئل کوچه لردن آپاریر
ائشیکده کی چیلغین هاوا
ایچیمده کی دومان آغیر
من آغلیرام
یاغیش آغلیر
یاغیش یاغیر
ساعاتلاردیر.
 
3.
آغاج لار
یول لار
داغ لار!
آغاج لارین بارماق اوجوندا
بیر اشارت وار،
سن گئتدیگین یوللارا دوغرو.
یوللاری بیر باشدان
آمما یوخ هر باشدان
توتوب گئدیرم
سنی داغلاردا
داغلاردا سنی
چاغیریب قایتاریرام
آغاجلارین بارماق اوجوندا
بیر اشارت یارادیرام سنی
یئنه باشدان-
باشدان...
 

4.
هئی تاکسی!
لوطفن منی یئتیرین!
یوخاریداکی جادانین
آلتیندان کئچن یولا!
او ساغداکی سولا دؤنون
او خیابانین آدی؟...
گؤزلریم گؤرمور آدینی
یاغیش یاغیر من آغلامیرام.
- بو کوچه اؤزودور
گؤزلرینده کی نم
دوداقلارینداکی قیفیل،
ائوده دیر یالقیزلیغیم!
سورون! او پنجره یه کی
آی دوغار سینه سینده
بیر آز ایشیق ایستیرم
قورخورام قارانلیقدان.
باغیشلایین
منی داغ باشینداکی دومانا یئتیرین
سیرریمی آچماق ایستیرم بولودلارا
قوی! اسفند آیلاریندا
گؤزلریم یاغسین
باهارلارا...
یوخ!
دایانمایین
گئدین
اوزاخ هر یئرده یئندیرین منی!
بوتون یوللاری ترسه سینه گئتمه ییم گلیر
چوخ غریبسه میشم
بو گون شَهَرده
ایتمه ییم گلیر!

[سعید موغانلی]

چاغداش قادین شعری (۱)
گئتدین ده خبر گلمه دی هئچ بیر کره سندن
ملیحه عزیزپور / تبریز
شاعیر – اؤیکو یازاری – اوشاق ادبیاتی آراشدیریجی¬سی – ژورنالیست

1358- ایلده اهرده دوغولموش و اوچ یاشی وارکن عایله¬سی ایله بیرلیکده تبریزه کؤچموشلر. اورتا تحصیلاتینی آنا تبریزده باشا چاتدیردیقدان سونرا، پیام نور اونیوئرسیته¬سینین «عمومی پئسیکولوژی» رشته¬سینده یوکسک تحصیل آلماغا باشلامیش و 1382-جی ایلده لیسانسینی آلمیشدیر.
اونون «یاغمور» آدلی ایلک شعر کیتابی 1382-جی ایلده و یئنه ده «دمیر سئوگی» آدلی ایکینجی اثری تبریزده ایشیق اوزو گؤروب، یایینلانمیش و اوخوجولار طرفیندن بؤیوک اوغور قازانان شعر کیتابلاریندان ساییلیر. آیریجا «گؤی گؤزلو تانری» آدلی قیسا شعرلر توپلوسو یاشماق سیرا کیتابلاریندان (17-جی اثر) 2200 تیراژدا یایینلانمیش و شعر سئورلر طرفیندن بَیه¬نیلمیش و ان آز سوره¬ده ان چوخ ساتیلان کیتابلاردان بیری اولموشدور. اونون «سو پیچیلتیسی» و «اون دؤرد قلم بزنمیش آی» شعر توپلولاری یاشماغین گله¬جکده یایینلاناجاق اثرلری کیمی مدنیت باخانلیغیندا نشر اجازه¬سی گؤزله¬مکده-دیر.
بیر چوخ تنقیدچی¬لرین باخیشینجا او آذربایجان چاغداش قادین شعرینین اؤنده گئدن و آوانگارد شاعیر یازارلاریندان بیری کیمی تانینماقدادیر. (دومان خییولو/یاشماق/2-جی سایی) و (جعفر بزرگ امین/یارین وئب سایتی)
او بیر چوخ درگی و قزئت¬لرده (حیدربابا- سهیل-آفتاب آذربایجان-گونش-دیلماج-یاشماق-آذر تورک- و ... ) پروفسیونال بیر ژورنالیست کیمی ادبیات ساحه سینده چالیشمیش¬دیر، اونون آذربایجان مطبوعاتیندا اوشاق ادبیاتی اوزره گئنیش چالیشمالاری و آراشدیرمالاری ماراق دوغوراندیر. وورغولاماسی یئرینه دوشردی کی، بو گونکو آذربایجان مطبوعاتینین هر بیر ساییسیندا اوندان بیر ایز گؤرمک اولار.
خانیم عزیزپورون اوشاق ادبیاتی اوزره توپلادیقلاری و یازدیقلاری اثرلر هله¬لیک ایشیق اوزو گؤرمه¬میش¬دیر.

1.

بیرگون،
تبریزه یولون دوشر یئنه ده
قالدیریملاری آددیملایارسان
کیتابلا دولو چانتانلا.
بیر قزئته آلارسان
خیاباندان خیابانا کئچرسن
«باغ قاباغی... بازار آغزی...
ساعات قاباغی... شاهناز...»
نه بیلیم، هاردانسا اؤترسن.
بیردن آدیم دَیر گؤزونه
اؤزون یادینا دوشرسن
یولونو دَییشرسن
بیر چای ایچیب دیجینی آلارسان
قزئته¬ نی واراقلارسا:
«حیدربابا یولوم سندن کج اولدو»
اؤره یین تؤکولر، قالخارسان
کیتاب ائولرینه باش چکرسن
اؤزونو گؤررسن، من یادینا دوشرم.
کوچه لری دولام - دولام دولانارسان
آدیم دَیر گؤزونه، اؤزون یادینا دوشرسن،
بیر ماهنی میزیلدایارسان دوداغ آلتی:
«تبریزین کوچه لری دولان با دولان...»
بیر دوستلا راستلاشارسان
ایکی کیتاب پای وئررسن،
شهرین کئفینی سوروشارسان:
«ایچ قاناماسی وار یولداش!..»
سوسارسان،
آددیملارینی سایارسان
نم نئچه یوز نئچه «سینیق موزاییک»...
ایشیق قیزارار، دایانارسان
آدیم دَیر گؤزونه، اؤزونه گلرسن
تابلوداکی اؤلوم آفیشینی اوخویارسان:
«دردسیزلیکدن، اؤزونو اؤلدوردو بو کئفلی...»
گولومسرسن، ایشیق گؤیرر
و، تبریزین الیندن توتوب گئدرسن...

2
بيز كي عئيني زاماندا
چيخديق آلما داشيماغا
بس نئجه اولدو
سن
قانادلانيرسان اوچماغا
من
هله اوشودوم ها اوشودومده قالميشام …

3.
سندن دؤنور‌م
او قدر بؤيوموشم كي،
شهر قالخيب آياغيما
من…
دوپ ـ دولويام بو آخشام
اوره‌ييمي‌ پاتلاماق ايسته‌يير‌م آووج‌لارينا
«نار» كيمي…
سندن دؤنور‌م
اؤزومه وارا بيلمه‌ميشم هله
مني توپلاسانا ايچيمه…

4.
اوردا بیر آغاج...!
بیر کندیر کیمی آسیلمیش بوینونا
اؤلوم بیچیمینده!
ایسته¬دییین کیمی آسا بیلرسن منی!
دادینی چیخارا بیلرسن یعنی!
بوردا بیر من؛
بیر چاتی ساللانمیش بوینوما...
یاشام بیچیمینده!
ایسته¬دیییم کیمی آسیلمایا بیلرم سندن!
و دادینی چیخارا بیلرم: اؤز / گور / لویون/!

اوردا بیر آغاج...!
بوردا بیر من...!
آرادا بیر سن...!

[admin]

sevgili səid bəy

bu gözəl və ilginc başlığı forumumuzda açıb bu gözəl şeirləri biz ilə paylaşdığınıza görə çox sağolun.
bu şeirləri oxumaqdan olduqca ləzzət aldıq

yolunuz açıq və işiniz davamlı olsun
E.M

[bextiyar muganoglu]

salamlar hurmətli səeid bəy səni xoş gurdum şanli elimin dəyərli oğlu şeilərindən lləzzə aldim yaşa..

[سعید موغانلی]

آلما موغانلی / تهران
شاعیر – ژورنالیست


1369-جو ایلده تهراندا بیر موغانلی عایله ده آنادان اولموش، ایلک و اورتا تحصیلاتینی همن شهرده کئچیرمیش و ایندی لیکده تهران اونیوئرسیته سینده فیزیک اتمیش ساحه سینده یوکسک تحصیلینی داوام ائتدیرمکده دیر. اونون شعرلری ان چوخ یارپاق قزئتی، یاشماق و دیلماج ژورنال لاریندا یایینلانمیشدیر.
آلما خانیمدان 1386-جی ایلده پیچاقلانمیش هئیوا» آدلی شعر توپلوسو، یاشماق سیرا کیتاب-لاریندان (دؤردونجو اثر) یایینلانمیش و باش چیخاران اؤلوم آدلی شعر آنتولوژیسینده اؤرنکلر وئریلمیشدیر. او هابئله شاعیر راسیم قاراجانین اؤلوم حاققیندا گونش» آدلی اثرینی کؤچورموش و (یاشماق سیرا کیتابلاری 5) یایینلامیشدیر.
او یاشماق و گونش ادبی بدیعی درگیلرینده چالیشمیش و گله جکده بیر نئچه کؤچورمه اوندان ایشیق اوزو گؤره جکدیر.

1.
پالتارلاریمی ؛
ایپ اوستونه سرمیشم!
یئل اسیر،
پالتارلاریم دالغالانیر...
اونلاری گئییرم،
دنیزه بنزه ییرم!!!
اونلاری گئییرم

2.
بير داش گليب شيشه ني سينديردي
اوندان سونرا پرده لري چكميشم
بير ده داش لار
شيشه ني گؤرمه سينلر...

3.
اووجومو آچيرام
بير قارغا اووجومدا يووا سالير
اوندان سونرا قارغالار آغ-آپباغ آغاريب
اووجوم قاپ- قارا قاراليب

4.
آيين مزاريني سو توتوب
بولودلار آغلايير آيا
و اولدوزلار قوناقليق توتوب
گونولرينين اؤلمه يينه
بير گؤزوم ياشلي دير
بير گؤزوم گولور
اولدوزلارا قوناق
بولودلارا دوست اولموشام

5.
ساغ اليمده گونشي، سول اليمده ياغمورو داشييرام
و گؤزلريمده سني
ال لريمين گئنيش لييي بير ماوي گؤي،
بير سويوق بولود
گؤزلريمين گئنيش لييي بير اوقيانوس
دنيزلر بوغولور گؤزلريمده
و باليق لار دالغالانير كيپريك لريم اوسته
قوش لار يووا سالير ساغ اليمده
و سول اليمده بير چتيرلي اوشاق گزير

بو ايل يئنه قوراقليق اولاجاق

6.
گؤزلرینده¬کی ایشیق منی چاغیریر سانکی
کیپریکلرین دنیزده کی گمی کیمی گئدیب گلیر ساحیله
اوزونده کی تبسومه آلدانیرام
کیپرییم ساغ یاناغیما دوشور
من سنی دیله ییرم
سنین دوشلرینه ساریلیرام
و دیلگیم دوشلریمده قالیر
ایشیق، گمی، تبسوم...
من یئنه فالجی قادینا آلداندیم!


7.
یاغموردا چتیرینی باغلا
بوراخ یاغیش گیله لری داراسین ساچلارینی
و بولودلاردویوزدورسون
بوتون ووجودونو
اؤپوشلرله
ساحیلی باشماغ سیز قدم له
قوملارین ایستیلیی ایله دانیش
تانرینی ،
گؤزلرینله
ساچلارینلا
و آیاقلارینلا
حیس ائت
و صاباح یوخودان دوردوغوندا
گونشین ایشیغیندا گؤزلرینی باغلاما
تانری بوتون سئوگیسی ایله سنینله باخیشاجاق


8.
دوداغینداکی بال دادی
گؤزلرینده کی پتک رنگی
ساچلارینداکی چیچک قوخوسو
و شئهلی باخیشلارین
دئییلدی یولدان کئچن اوغلانی آریلاشدیران
اونون ساده جه اوچماغی گلمیشدی
دوداغلاریندا اؤلمه سه یدی!

9.

دارالیب دونیا
داریخیرام!
سیخیلیرام!
قبریستانلیق چوخ گئنیشله¬ییب
بیر آز قورخورام
اوچونجو دونیا ساواشی باشلاماقدادیر
بیر قوشون آغ کؤینکلی دونیانی آلماغا گلیر!

[سعید موغانلی]

نیگار خیاوی / مشکینشاعیر- چئویرمن- اؤیکو یازاری


نیگار خیاوی 1339-جو ایلده مشکین/خیاو شهرینده آنادان اولموشدور. تحصیلاتینی اؤز دوغما شهریندا باشا چاتدیرمیش، بیر نئچه ایل حیات یولداشینین ایش اوجباتیندان دوغما یورددان اوزاق، ایرانین باشقا شهرلرینده یاشامیش و آرتیق تبریز شهرینی یاشام یئری سئچمیش، او 1368-جی ایلدن بری یازیب، یاراتماغا باشلامیش و گونئی آذربایجان فئمینیست شاعیرلریندن ان اؤنملی و باجاریقلی¬سی کیمی اؤز اثرلرینی یایینلامیشدیر.
اوندان ایندییه قدر «منیم شعریم / 1375»، «کؤلگه¬ده کی سس / 1376» و «شهرین جیریغیندا نیگار/ 1384» و «الیمده اللی بارماق / 1386/ یاشماق سیرا کیتاب¬لاری 20» آدلی دؤرد شعر توپلولاری ایشیق اوزو گؤروب. نیگار خیاوی هم ده بؤیوک سئحیرلی رئالیزم بانی¬سی «غلامحسین ساعدی»نین ایکی (بَیَل یاسلی¬لاری و توپ» رومان¬لارینی تورکجه¬میزه چئویرمیشدیر.
اونون بیر چوخ اثرلری «آذری-دیلماج-یارپاق-یاشماق-آلاتوران و گونش ادبی بدیعی درگی¬لرینده درج اولموشدور. آذربایجانیمیزدا ان چوخ اثری یایینلانان و ان چوخ اوخوجوسو اولان شاعیرین (لوایی ایله بیرگه)، سون اثری (الیمده اللی بارماق) باکیدا دا نشر اولموش و بؤیوک مارقلا قارشیلانمیشدیر. اونون اثرلرینده پست مدرنیزمین ایزلری آچیق آشکار اؤزونو اوخوجویا گؤسترمکده¬دیر ائله محض بونا گؤره ده بیر چوخ ادبیات آراشدیریجی¬لاری و تنقیدچی¬لر (آتیلا کیشی¬زاده/یاشماق/ایکینجی سای) و (جعفر بزرگ امین/یارین وئب سایتی) و ... اونو چاغداش شعریمیزین اؤزللیکله قادین شعرینین اؤنده گئدن تمثیلچی¬سی حساب ائدیرلر.
نیگار خیاوی بیر نئچه ادبی فستیوالین اؤزللیکله حیکایه فستیوالینین ژوری هئیتی اولموش، او جمله¬دن «سونای حیکایه اؤدولو»نو (اسماعیل هادی-رسول یونان-رضا کاظمی و محمد صبحدل) ایله بیرگه داورلیک ائتمیشدیر.  
1.
سنجه بوگون ياغيش¬مي ياغاجاق يا ياغيب بو ايزوگامي چاتلاميش شهره
يا قفيلدن قارسيز بير قيشا باشلاياجاق يا باشلاييب باشا دوشموروك هله-هله
ميرتا ساليب قامچي-قامچي باشلاييب ياغمور بومبا-بومبا پارتلايير قارلار
سن هله قوشلاري آغاجدان كيشله¬يه-كيشله¬يه ديبينه كيشنه¬ييرسن
و كاش بئله، كاش ائله اولسايدي اولماسايديدا اوينايا-اوينايا
اؤز اؤزووه ايشه¬ييرسن
داش باشا دوشور باشا دوشمورسن
هووخور هووخور حارام بوغارساغيوا كي آتوملو چَه¬ييردك تومانجاق گؤتونده هاوالانيب
هادير اول ايينه¬نين اوجوندان
بو سفر هادير اول سودوك قوووقوندان كي قيديقلانسا چه¬ييردكلي آتوملا بيرليكده قان قنديلينه آسيلاجاق بو قَهرلي شهر
قارنيمداكي اوشاق دونيايا دوغماغا رَي وئرمير
سانجيلي صانديقلاري گؤرنده ايلان كيمين قيوريليب قارنيما چنبرلنير
هئج نمنه¬سينه ¬ده مني سايمير
قارنيمدان چيخان ائودن قاباق الدن چيخير
خياوانين اَينيندن چيخانمير
بئله گئديرسه پنچر باشيميز هاردان زاپاس آختارسين قاپاز آلتيندا كي ييرتيغيني دَييشديرسين
نه بويدا زاپاس سوراقلاشاق كي بو بويدا پنچرلريميزه...
ياني گئنه سوْلاخاي سوْلاخاي سالاملاشاق
چئري چئري گولومسه¬يك سحره سيكدير وئرن پنجره¬لريميزه
زادزاد دئيه تئزتئز تئز باشدان اولاق
نئينه¬ميشيك كيمه نه¬يه كيمه نه¬يه قاليب بيزيمكي بيلميرم بيلميرم بيلميرم
باختيميزين بولبولو بوببولاشيب قفسينين گئنيشليييندن دييه¬سن
بوي بوي بوي بوي ي ي ي
بادالاق آتير چالاچوققور قودورقيزميش خياللار خياللاريما
و يالاندان خومار خانيملار
خياوانلاردا ياوانليق آختارير
بيلميرم چؤره¬كلرينه بيلميرم امجك جمدكلرينه يا نه¬لرينه
كي جينسل عقده¬لردن جينه دؤنموش آغالار ايفليج عقيده¬لريني آليب شئيلرينين باشينا آرخاسيني گوپ گوپ يئره گوپسه¬يير
و جيبلريندن اوخاي اوخاي دييه مين مين تومن تومن تؤكولور مين بيرگئجه شهزاده¬لري بير گئجه¬ده نئچه¬سي بير يئره
ساچي سومه¬يه دؤنوب بوشهر
بوكولوب يوماغا دؤنوب بو شهر
درماني واختيندا يئتيشمه¬ين هيرويونلو آروادا دؤنوشوب بو شهر
ياماقلي چادراسيني چكيب باشينا ياخيليب قوساقلي دووارلار ديبينده يالوارا دالدالانير
اوزو قويلو خومارلانير اينجه اينجه
تپه¬سي يومروقلانير دالبادالا يوماقلانير
گئنه بوگون هاوا نئجه اولاجاق گؤره¬سن گئجه عزيز ديلنچي¬لر دينله¬ييجيلر؟

2.
قاراباغ قورباغاسي
بو قورباغا بير آغيز قاراباغ شيكسته¬سي قورولداماق ايسته¬يير
نئچه گؤللوك قورباغادي بللي دئييل
بيرآزي توسباغا بيرآزي آغا
آنجاق بوگونه¬دك گؤردويوم ان قورباغا
قورقور قاغا
زحمت¬دي باغيشلايين چاتديرا بيلسه¬نيز
يادا ايشدي چاتسا الينيز قاراباغين چؤلونه
قارا بير داش تاپيب لطفن آتين بو قورباغانين بوغازيندا ايليشن گؤلونه
يوخسا شيكست اولموش قاراباغدان دويونقارينا بير قورولتويا قاشينير آغيز بوغازي:
عززينم آآآ....ي تن دردي وطن دردي گئدر گلر اؤلدوره¬ر مني
نئينيم ال چك ياخامدان اييرمي فاييز بسدي بسيمدي گؤره¬ر مني
دي دور گل قويما اوچور باشيمدان گل قادان آآآليم
بير چتول آراق ياريم متير دؤنر كاباب دؤنر مني دؤنده¬ره¬ر مني
او يانا دؤندر مني يار بويانا دؤندر مني
اؤلورم اؤلورم اؤلوره ه ه.....م گَل دردين آآآ.....ليم

عززينم آآآآ...ي گؤدن ياخشي
بير فينجان آرادا گؤبك ياخشي
دئييرم وطن بيرآز ييغجام بيرآز گؤدَك ياخشي
اَده بئله گؤبك ياخشي گؤدن ياخشي
پاي وئرمه¬يه آآآ...ي باااالام هر نه¬دن وطن ياخشي
اؤلمورم اؤلمورم اؤلموره¬ ه ه ....م